ఋతు రాగం

వసంతంలో నీకు వినిపించే

కోకిల మధుర గానంలో....

గ్రీష్మంలో చురుక్కుమనిపించే

బాలభానుని తొలికిరణంలో...

వర్షఋతువులో  నిను తాకి 

ఆవిరయ్యే తొలకరి జల్లులో...

శరత్తులో నిన్ను చూసి 

పరవశించే పున్నమి వెన్నెలలో...

నీ కంటి కాంతులకు మెరిసే 

హేమంతపు హిమబిందువులలో...

శిశిరంలో నీకు వినిపించే

ఎండుటాకుల గలగలలో.....

నా ప్రేమ పలకరింపులుంటాయి  ప్రియా!

నా ప్రేమ  పలకరింపులుంటాయి ప్రియా!

నేను నువ్వైపోయిన నీకోసం

ఓ ప్రణయ పవనమా!

మధుర స్వప్నమా!

మౌన రాగమా!

మనోహర రూపమా!

నా తనువై...అణువణువై...

నా కణ కణాలలో

నేనే నువ్వై ,

నువ్వే నేనై...

నిండిపోతే ఎలా?

ఉండిపోతే ఎలా?

సిగ్గుతెరల మాటునుండి

బైటికి వచ్చి... 

నీ ప్రేమని ఒప్పుకొనేదెలా?

ఈ విరహ తిమిరం నుంచి...

నేను తప్పుకునేదెలా?

మానస వీణ

నా మానస వీణను నీ ప్రేమతో శృతి చేసావు...

అదే శృతిలో నాలో ప్రేమ రాగాలు పలికించావు..
నీ ప్రేమ సంగీతం వినిపించావు.

ఇంతలోనే ..
ఆ వీణ తీగల్ని నిర్దాక్షిణ్యంగా తెంపి,

ప్రేమ సరిగమలను అపస్వరాలుగా మార్చి...

వెళ్లి పోయావు....

నా మానసవీణ

మూగబోయింది..
ఆ అపస్వరాలను పలికించలేక.
మళ్ళీ ఆ వీణ ప్రేమసంగీతం పలికే దెపుడో???
మళ్ళీ ఆ వీణ ప్రేమసంగీతం పలికే దెపుడో ???

నీ మనసున నా తలపులు

ప్రియా!

వసంతం వచ్చేసింది...

మదనుడు

తన శృంగార రథపు అశ్వాలను..

నీ జడకొరడాతో  అదిలిస్తూ తరలి వస్తున్నాడు.

చెరకు వింటిని ఎక్కుబెట్టి 

నన్నే లక్ష్యంగా చేసుకొని

కుసుమశరాలను

గురి తప్పకుండా

వదులుతున్నాడు.

అనుక్షణం నీ తలపులతో జీవించే 

నాతో వైరం ఎందుకని

ప్రశ్నించాను.

దూరంగా ఉన్న 

నీ మదిలోని 

నా వలపు తలపులే....

తన శరములని బదులిచ్చాడు.

నీ మదిలోని

నా వలపు తలపులే.....

తన శరములని బదులిచ్చాడు.

అంకితం

నీ పెదవుల ఎరుపులో ముంచిన కుంచెతో

నీకు రాసిన ప్రేమలేఖ నచ్చలేదన్నావు......

నీ కాలి పారాణిని అద్దిన వేలితో 

నీకు రాసిన ప్రేమలేఖ సరిగా లేదన్నావు....

నీ చిగురుటధరాలపై

నా నాలుక కొసతో రాస్తే

లేఖలే కాదు ప్రేమకావ్యం రాసినా..

స్వీకరిస్తానన్నావు.

అలాంటి ఎన్నో కావ్యాలని ...

నాకు  పదే పదే అంకితమిస్తానన్నావు...

నాకు పదే పదే అంకితమిస్తానన్నావు....

ప్రేమ సంకెళ్ళు

తమస్సులో,ఉషస్సులో

నీకోసం వేచి చూసాను చెలీ!

నా కోసం,నీకోసం, 

మనకోసం, 

మన ప్రేమ కోసం,

వస్తావని వేచి చూసాను చెలీ!

బంధాలు,అనుబంధాలు

తెంచుకొని

చేసిన బాస కోసం వస్తావని

వేచి చూసాను చెలీ!

బంధాలు, అనుబంధాలు 

తెంచేసుకున్నావు  నాతో....

నీ కాలికి పాశమైన నా ప్రేమ సంకెళ్ళనే 

తెంచేసుకున్నావు చెలీ!....

నీ కాలికి పాశమైన నా ప్రేమ సంకెళ్ళనే 

తెంచేసుకున్నావు చెలీ!....

ముద్దు

అరచేతి మీద ముద్దు...అరవిందం.

నుదిటి మీద ముద్దు... నీలాంబరం.

మెడ  మీద  ముద్దు...ముత్యాలసరం.
కంటి మీద ముద్దు ...కనకాంబరం.

ముక్కుమీద ముద్దు... ముద్ద మందారం.

చెంప మీద ముద్దు...చెప్పదు  అడ్డు
పాదం మీద ముద్దు...పారాణి అద్దు.

చెవి మీద ముద్దు... చెరిపేసే  హద్దు.

తొలిముద్దు... తొలకరి జల్లు.
పాపిటి మీద ముద్దు... పన్నీటి జల్లు.

పెదవి మీద ముద్దు...పులకరింతల హరివిల్లు.

ప్రియమైన ముద్దు....పరవశాల  విరి జల్లు.

ప్రియురాలి ముద్దు... వెన్నెల్లో మల్లెల జల్లు ,

అంతరంగాలలో దాచుకునే...సరసాల విల్లు.