జయ ఉగాది

(అందరికీ శ్రీ జయ నామ సంవత్సర శుభాకాంక్షలు )

|| జయ ఉగాది  ||

మావిచివుళ్ళను ఆరగించిన గండుకోయిల 

మత్తెక్కి మధురగీతాలు ఆలపిస్తుంటే

వగరు మామిడిపిందెలను కొరుకుతూ

తీపి పలుకులు వల్లిస్తూ చిలుకలు సందడి చేస్తుంటే

ప్రతితరువు చిత్రసుమాల సొబగులద్దుకుంటూ

వసంతునితో కళ్యాణానికి ముస్తాబులౌతుంటే

ప్రకృతి కాంత పచ్చని పట్టుచీర చుట్టుకొని 

ప్రతి మార్గంలో సుమాలు వెదజల్లుతుంటే

కొమ్మల కొప్పులెక్కిన సిరిమల్లెలు 

పలుదిశల పరిమళనృత్యం చేస్తుంటే

తుంటరి తుమ్మెదలు ఝుంకారాలు చేస్తూ

విరికన్నెల ప్రసాదాలకై  ప్రదక్షిణలు చేస్తుంటే

చెరకు విల్లుతో మదనుడు సుమశరసంధానం చేస్తూ 

తేనెటీగల అల్లెతాడును ఏకబిగిన మ్రోగిస్తుంటే

శ్రీగంధం పూసుకొని సుమలతలు చుట్టుకొని

చైత్రరథం చక్రాలధ్వనితో పుడమిని పులకింపజేస్తూ

తరువులన్నిటినీ  పలకరిస్తూ...సుమగంధాలను ఆఘ్రాణిస్తూ

శిశిరాన్ని తరిమి కొడుతూ...విజయదుందుభి మ్రోగిస్తూ

జయకేతనం ఎగురవేస్తూ...విచ్చేసాడు ఋతురాజు

అపజయమెరుగని 'జయ'నామధేయుడు.                    ...@శ్రీ 

(చిత్రకారులు వాసు గారికి ధన్యవాదాలతో ...)

|| హోలీ ||

మకరందపానం చేస్తూ...
మాధుర్యాన్ని అందించిన సీతాకోక చిలుకలకి 
సిగ్గులభారాన్ని లెక్కచేయక...
వాటి రెక్కలకి తమ వర్ణాలని అద్దుతూ ప్రతి సుమం
నిత్యం ఆడుతుంటుంది రంగుల హోలీ

ఉదయకిరణాలను
క్షణానికో రంగులోనికి మార్చేస్తూ
ప్రతివర్ణాన్నీ తూరుపు సంధ్యకు పులిమేస్తూ
అస్తాద్రి చేరుతూ వీడ్కోలు పేరుతో
సంధ్యాసుందరి బుగ్గలకి సిందూర వర్ణాలు పూసేస్తూ
ఆదిత్యుడు నిత్యం ఆడుతుంటాడు రంగుల హోలీ

ప్రతి తరువునీ తపనతో తాకేస్తూ
ప్రతి కొమ్మపై రంగుపూలు చల్లేస్తూ
పుడమి నిండా సందడి చేస్తూ
ఋతురాజు ఆడేది రంగుల హోలీ 

సంధ్యా సమయాలలో
మేఘమాలికలు కురిపించే చిరుజల్లులను
ప్రభాకరుని కిరణాల సాయంతో అల్లరి పెడుతూ
ఆ నీలాలగగనం ఆడేది సప్తవర్ణాల హోలీ.

క్రోధంలో కెంపురంగుని విసురుతూ
నవ్వులతో ముత్యపువర్ణంలో తడుపుతూ
ప్రేమలో సతతహరితాన్నందిస్తూ
నా మదిలో లెక్కలేనన్ని వర్ణాలు నింపుతూ
నీవాడేది రంగురంగుల హోలీ...వేల వసంతాల కేళి. ...@శ్రీ

|| సంబరాల సంక్రాంతి ||

అందరికీ శుభాకాంక్షలతో...@శ్రీ 

కళ్ళాపి జల్లిన వాకిట్లో 
తారలను తలపించే వెండి చుక్కలు 
హరివిల్లు కొత్త రంగులు పులుముకొని 
నేలకి దిగి వేళ్ళ సొగసులని తోడు చేసుకొని 
అందంగా రంగవల్లులుగా మారిన శోభలు
కన్నెపిల్లలు అలంకరించిన గొబ్బెమ్మలు
పచ్చని పంటలతో ముస్తాబైన పల్లెసీమలు

భానుని అగ్నిఖండికలను తలపించే భోగిమంటలు
పవిత్రగోమయంతో చేసిన
భోగిపిడకల దండలతో చిన్నారులు
భగవన్నామ సంకీర్తనలతో
ఇంటింటా పుణ్యాన్ని పంచే హరిదాసులు
సాంబశివుని నందీశ్వరుని కళ్ళముందు నిలిపే బసవన్నలు.

ప్రతి మోమున ఆనందాల కాంతులు
ప్రతి ఇంటా సంక్రాంతి వేడుకలు
అంబారాన్ని చుంబించే సంబరాలు....@శ్రీ 15/01/2014

|| భామలలో భామ ...సత్యభామ ||

పదునాలుగు లోకాలలో లేని సౌందర్యనారి. 
రాజసం ఉట్టిపడే రాకుమారి
పూలకి సౌకుమార్యం నేర్పే సుకుమారి.
మాధవునికి అత్యంత ప్రియమైన దేవేరి.


భక్తిలో రుక్మిణికి తీసిపోదు
ప్రేమలో రాధకి పోటీదారు.
క్రిష్ణుని చేతిలో శృతి కావాలనుకొనే రతనాల వీణ
కన్నయ్యని కొంగున కట్టుకొని వెంటతిప్పుకున్న నెరజాణ
అలుకకే అలుకలు నేర్పిస్తుంది.
అనంగరంగంలో అ రతీదేవిని తలపిస్తుంది.

అస్త్రశస్త్ర విలువిద్యా కౌశలం ఆమెకి అదనపు బలం
అందుకే...పదారువేల ఎనమండుగురిలో సత్య స్థానం ప్రత్యేకం.

యుద్ధానికి సై అన్న సత్యభామ జగానికి చండిక
నరకుని దృష్టిలో కాళిక
కన్నయ్యకి మాత్రం కర్పూరకళిక.

నరకునిపై నిప్పులు కక్కిన కన్నులు
కన్నయ్య వైపు మధ్య మధ్య ప్రేమగా చూసే వెన్నెలదొన్నలు
విల్లెత్తిన రౌద్రరూపం
నరకునికి కాలుని పాశం.
మాధవునికి మాత్రం ధనువు పట్టిన శృంగార చాపం.

సాత్రాజితి శౌర్యం ముందు
నరకుని క్రౌర్యం తల దించుకుంది
కృష్ణునితో కలిసి లోకకంటకుని సంహారంలో
సత్యభామ తన పాత్ర విజయవంతంగా పోషించింది ...@శ్రీ

|| చంద్రదర్శనం చేసే జాబిల్లి ||

నీ తలపులలో నారూపాన్నే చూస్తూ
ఆరూపం చూసే చూపులకు
సిగ్గుపడిన చెక్కిలి గులాబి రేకులను 
నీ చేతిలోనే పండాలని
తహతహలాడే గోరింటలో కలిపి
అలదుకున్న అరచేతులు
మంకెనలని పరిహసిస్తున్నాయి...కెంపులని ధిక్కరిస్తున్నాయి.

కట్టుకున్న పట్టుపావడా
పట్టు లాంటి నీ మేనుపై
కొత్తశోభను సంతరించుకొంది.
విరిబోణి అందాలను దాచలేని
తెల్ల ఓణి అవస్థ పడుతోంది.
నీ సౌందర్యనిధులకి కావలి ఉన్నట్లుగా కనబడుతోంది.

పూలబాణాల విలుకాని
చెరకువింటి నారిలా
మల్లెమాలలు తురుముకొని
బంగారు జడగంటలు మోగిస్తూ
యవ్వనాన్ని అదిలిస్తూ
నీ ఒంపులను అనుకరిస్తూ
మెలికలు తిరుగుతోంది
నేను మెచ్చిన వాలుజడ
నీలికురుల నాగమాలిక

నాప్రేమ రంగరించిన పారాణి పూతలకి
కెందామరలుగ మారాయో
పెట్టుకున్న గోరింటకు
నీ కాలి మువ్వల రాత్రి ఊసులతో జతకలిపి
మరింత ఎరుపెక్కాయో
కట్టిన పరికిణీ బంగారుజరీ తగిలి కందాయో
తెలియని నీ పాదాల సౌందర్యానికి
తూరుపు దిక్కు సిందూరం సలాములంటోంది.

మర్రిమానుకి కట్టిన పూల ఊయలదే భాగ్యం
ఏడుమల్లెలెత్తు సౌకుమార్యానికి
ఆసనమయ్యిందనే గర్వం.
తామరతూళ్ళకి పాఠాలు చెప్పే చేతులకి
ఆసరా ఇచ్చానన్న అతిశయంతో డోలనాలు చేస్తోంది.

వెన్నెలమ్మ నోము పట్టడం మొదలెట్టకుండానే
నీ మోము చూచి ఉపవాసం చాలించింది
నక్షత్రాలు నీ నవ్వులు చూసి తమ పని లేదని
వేకువలో దాగేందుకు పరుగెత్తి పోయాయి.
నీ కిలకిలలతొ శుకపికాలు మేల్కొన్నాయి.

తదియనాటి చందమామ కోసం నీవు చూస్తుంటావు
చంద్రదర్శనం చేసే జాబిల్లిని అబ్బురంగా నేను చూస్తుంటాను.    @శ్రీ 

(ప్రముఖ చిత్రకారులు వాసు Vasu Chennupalli గారికి కృతజ్ఞతలతో...)

"విజయోత్సాహాల ఉగాది "

ప్రేమను ప్రేమించు...ప్రేమకై!...గ్రూప్ నిర్వహించిన ఉగాది కవితల పోటీలో 'ప్రథమ బహుమతి' పొందిన నాకవిత...ఈ విజయాన్ని          శ్రీ విజయ నామ సంవత్సరంలో  అందరికీ పంచుతూ....మీ మిత్రుడు @శ్రీ 

||విజయోత్సాహాల యుగాది ||....(ఉగాది కవితల పోటీకి)

నవపల్లవ కుసుమ పరాగాన్ని మోసుకొచ్చే 'పిల్ల'గాలుల పరిమళాలు.
మామీచిగురు తిని మత్తెక్కిన కోకిల ఆలపించే మధుర గీతికలు.
సీతాకోక చిలుకల కోలాహలాలు
కొమ్మలకున్న ప్రతి సుమాన్నీ పలకరిస్తూ
మోహావేశంతో మధుసేవనానికి తొందరపడుతూ మధుపాలు చేసే ఝంకారాలు.

తేటికాటు తిన్న పూబాలలు సిగ్గుతో తలలు దించుతూ
పుప్పొడి అంటిన తుమ్మెద పాదాలనుమకరందాలతో అభిషేకిస్తూ,
ఆ పాదాలను తుడిచే సుమదళాలు.

వన్నెల వయ్యారుల కొప్పులలో మత్తెక్కించే మల్లెల సౌరభాలు.
జడ చాటున దాగి పరిమళాల జావళీలు పాడే విరజాజుల మాలికలు.
యువకుల మనసులలో దూసుకుపోయే మదనుని అదృశ్య శరాలు.

నలుదిశలా వేవేల వర్ణాలతో సర్వాలంకార శోభితమై
నందనవన సౌందర్యాన్ని తలదన్నేభూలోక ఉద్యానవనాలు.
శుకపికాల సంగీత సమ్మేళనాలు.

నన్ను గెలిచేందుకు కాముని తోడు తెచ్చుకున్నావంటూ,
విజయ వాసంతుని పరిహసించే వనకన్య విరిజల్లుల మందహాసాలు.
మనసున నవనవోత్సాహంతో
చైత్రరథానికి స్వాగతం పలుకుతున్న సుమవనాలు

మంచుపూల దుప్పటి కప్పుకున్న శిశిరాన్ని తరుముతూ
పూలతేరుపై వాసంతుని ఆగమనం.
ప్రకృతి కాంతపై వలపువిజయం సాధించాలని...
ఎల్లరకూ శుభాలు పంచాలని... 'శ్రీ'

వలపుల తలపుల హోలీ

|| వలపుల తలపుల హోలీ ||

ప్రతి రాత్రి నా కళ్ళతో నీ జ్ఞాపకాలు ఆడేది హోలీనే
ఎర్రనిరంగు కళ్ళకి జీరగా మార్చేస్తూ 

రవికిరణం తుషారకణాలతో హోలీకి 
ఎప్పుడూ సిద్ధమే సప్తవర్ణాలతో

నీవు నామనసుతో ఆడేది హోలీనే
అసంఖ్యాకమైన వర్ణాలను నాలో నింపేస్తూ

సాగరాకాశాలకి నిత్యం హోలీనే
ఒకరికొకరు నీలి వర్ణం పూసుకుంటూ.

మాధవుడు రాధమ్మతో హోలీ
నీలాన్ని కనకపుష్యరాగమయం చేస్తూ.

నా తీపిఊసులు నీతో ఆడేది హోలీనే
గులాబిరంగు సిగ్గులబుగ్గలకి పూస్తూ.

ఆదిత్యుని హోలీసంధ్యా సుందరితో 
చెక్కిళ్ళలో కెంజాయరంగుని చిత్రిస్తూ..

రజనీకాంతుని హోలీ నిశాసుందరితో, 
తనువంతా రజతవర్ణశోబితం చేస్తూ.

వసంతుని హోలీ
కొమ్మకొమ్మనూ వేల(వేళ్ళ) వర్ణాలతో కొంటెగా స్పృశిస్తూ.

శ్రీ కలం హోలీ...
అక్షరాల్లో సప్తవర్ణాలను నింపేస్తూ,
భావాలకి వేలరంగులు పులిమేస్తూ.
కవితా కన్యకను కోటి రంగులతో అలంకరిస్తూ...@శ్రీ 

ఒక్కసారి లింక్ మీద క్లిక్ చేయరూ!...

http://www.flashscrap.com/data/tools/diwali-greetings.swf?mes=TO+%0DALL+MY+DEAR+N+NEAR+FRIENDS%0D%0D%0D%0D%0D%0D%0D%0D%0D%0D%0D%0D%0D%0D%22quality%3D%22high%22wmode%3D%22transparent%22menu%3Dfalse

శ్రీ సీతారామ కళ్యాణం

సభంతా కిక్కిరిసి ఉంది.

రాజాధిరాజులు, చక్రవర్తులు, సామంతులు

తమతమ శక్తి సామర్థ్యాలు ప్రదర్శించి

శివుని విల్లు ఎక్కుబెట్టి 

'సీత'ను సొంతం చేసుకోవాలని ఉవ్విళ్ళూరుతున్నారు.

ఒక్కక్కరే  ప్రయత్నించి  అవమానభారంతో

వెనుదిరుగుతున్నారు.

జనకుని మనసులో ఆందోళన.

మిథిలాధీశుని పట్టపురాణి ముఖములో 

నిరాశ,నిస్పృహలు అలుముకున్నాయి ....

మైథిలి క్రీగంట శ్రీ రాముని చూసింది.

పురుషులకి సైతం మోహనంగా కనిపించే 

ఆ రూపాన్ని మనసులో చిత్రించుకుంది.

రాముని చూపు సీతపై పడింది...

చూపులు కలిసాయి...

రాముని తనువు విద్యుద్ధనువైతే

సీత మేను సిగ్గుల హరివిల్లే అయింది.

విశ్వామిత్రుని ఆజ్ఞ అయింది

శివధనస్సుని సమీపించాడు రాముడు.

క్షణం  క్రితం చూసిన సీత బరువైన  పూలజడ మదిలో మెదిలింది.

ఈ విల్లునే  ఎ త్తలేకుంటే రేపు ఆ జడనెలా ఎత్తగలను? అనుకున్నాడు.

అలవోకగా శివధనువునెక్కుబెట్టాడు

ఆ ధనుష్టంకారానికి పృథ్వి దద్దరిల్లింది 

ఫెళ్ళున పిడుగుపాటు ధ్వనితో విల్లు విరిగింది.

సీత పెదవిపై చిరునవ్వు విరిసింది

మిథిలలో సంబరాలు అంబరాన్నంటాయి

సీతమ్మ పెల్లికూతురయ్యింది.

సీతారాములు కళ్యాణమాలలు మార్చుకున్నారు,

ముత్యాల తలంబ్రాలు పోసుకున్నారు.

దేవపారిజాతాల   పుష్పవృష్టిలో  సీతారాములు పరిమళభరితులయ్యారు

శ్రీ సీతారాముల కళ్యాణం కమనీయం,

అది లోక కళ్యాణం, జగత్కళ్యాణం,

ఈ విశ్వానికే  నిత్యకళ్యాణం-పచ్చతోరణం.

                                                                                         @శ్రీ 

(అందరికీ ' శ్రీరామనవమి'  శుభాకాంక్షలతో...)

'నందన' ఉగాది

సిరిమల్లెల ఘుమఘుమలు
నలుదిశల వ్యాపిస్తునాయి.
వసంత కోకిల కుహు,కుహులతో
ప్రకృతి పరవశిస్తోంది.


ప్రతి చెట్టు... పెళ్ళికి ముస్తాబైన 
నవ వధువులా కనిపిస్తోంది.
ప్రకృతి అంతా సౌందర్యమయంగా
ఆనంద భరితంగా కనిపిస్తోంది...


పిల్ల తెమ్మెర లోని చల్లదనంలా...
కోకిల పాటల లోని మాధుర్యంలా...
పూల మకరందపు మత్తులా...
కుసుమ పరాగాల పరిమళంలా...
'నందన' వనం లోని పారిజాతాల వర్షంలా...


"నందన" నామ సంవత్సరం వచ్చేసింది ..
అందరికి ఆనందాన్ని పంచేందుకు.....
అందిరికి నూతనోత్సాహాన్ని ఇచ్చేందుకు...
అందుకే ఈ ఉగాది...నందన ఉగాది,
'ఆనంద' ఉగాది. 

పుష్పాల హోలీ

మురళీధరా!

నీవు పంపిన చేమంతులు నా'చెంప'ను తాకితే

ముద్దబంతులు నా 'పెదవి'ని ముద్దాడాయి.

పున్నాగ పూలు పాలకడలి లాంటి పొట్టను తాకితే..

పొగడపూలు పొక్కిలికి చక్కిలిగింతలు పెట్టాయి.

సంపెంగలు సిగలో చేరితే

మరుమల్లెలు ముఖం మీదుగా  జారాయి.

మందారాలు బుగ్గల సిగ్గుని తాకితే 

కెందామరలు పాదాల ఎరుపుని పలకరించాయి 

సన్నజాజులు సరసమాడితే

విరజాజులు వెన్నెలై కురిసాయి.

పారిజాతాలు పై పైన పడుతూనే ఉన్నా

గులాబీలు గుండెకు చేరువైతే

వాటి గుబాళింపులు 

నా గుండెగుడిలోని నిన్ను ప్రేమతో  స్పృశించాయి

నీ పుష్పవర్షంతో నా తనువంతా 

పులకరించి పరవశించింది....

నీ ప్రణయ పుష్పవర్షంలో తడిసి 

నీకై మరింత కలవరించింది.                                     @ శ్రీ

                

        ( రాధ కృష్ణుల పూలతో ఆడే హోలీ గురించి విన్నాక ఈ హోలీ నాడు ఈ కవిత అక్షర రూపం  దాల్చింది)

                                                                                                                            

   

వసంతం

లేత మావిచివుళ్ళను   

ఆరగించిన గండు కోయిల 

మత్తెక్కి చేస్తున్న

మధుర గానలహరి 

ఒకవైపు వీనులవిందు చేస్తోంది.......

లేత  వగరు మామిడిపిందెలను కొరుకుతూ

తీపి పలుకులు వల్లిస్తున్న చిలుకలు  

మరొక వైపు సందడి చేస్తున్నాయి.

నవ పల్లవ కుసుమ పరాగాన్ని

మోసుకొచ్చే 'పిల్ల'గాలుల పరిమళం

మనసుకి ఆహ్లాదాన్ని కలిగిస్తోంది.

వన్నెల వయ్యారుల 

కొప్పుల మల్లెమాలలు

కొత్త పరిమళాలతో, 

మనసున చెలరేగే 

ఊహలకు

మరింత మత్తెక్కిస్తున్నాయి.

ప్రకృతి కాంత పచ్చని చీరతో...

లతల ఆభరణాలతో...

పూల తేనియ తీయదనంతో...

వసంతపు కొత్త సొగసులద్దుకొని

వలపు వానల ఋతురాజు రాకకై 

ఎదురు చూస్తోంది.

వలపు వానల ఋతురాజు రాకకై 

ఎదురు చూస్తోంది.