12 గంటల రికార్డు భక్తి సదస్సు

తిరుమల తిరుపతి దేవస్థానం ఆళ్వారు ప్రాజెక్ట్

మరియు శ్రీ పద్మావతీ మహిళా కళాశాల వారు సంయుక్తంగా నిర్వహించిన

12 గంటల రికార్డు భక్తిసదస్సుకి ఒక పర్యవేకునిగా వెళ్ళడం నా అదృష్టం.

ఈ కార్యక్రమాన్ని  వండర్ బుక్ అఫ్ రికార్డ్ , మరియు తెలుగు బుక్ అఫ్ రికార్డులలో నమోదు చేసారు.

ఆ కార్యక్రమంలో నా ప్రసంగం ఇలా  :

 “శ్రీ రామ రామ రామేతి రమే రామే మనోరమే | 
సహస్ర నామతత్తుల్యం రామనామ వరాననే” ...

ఆదికావ్యనాయకుడైన శ్రీరామచంద్రమూర్తికి వందనాలు అర్పిస్తున్నాను.

“ఆదౌ రామ తపోవనాది గమనం హత్వా మృగంకాంచనం

వైదేహీ హరణం  జతాయుమరణం  సుగ్రీవ సంభాషణం

వాలీ నిగ్రహం  సముద్ర తరణం లంకాపురీ దహనం

పశ్చాద్రావణ కుంభకర్ణ హననం యే తద్దిరామాయణం”

ఒకే శ్లోకంలో రామాయణాన్ని చెప్పినప్పటికీ గాయత్రీ మంత్రంలోని ఒక్కొక్క అక్షరానికి ఒక్కొక్క వేయి లెక్కతో  24000 శ్లోకాలతో 537 సర్గలతో ( ఉత్తరరామాయణం ప్రక్షిప్తమని అంటారు పరిశీలకులు )   వాల్మీకి మహర్షి రచించిన రామాయణం గురించి ఎంత వ్యాఖ్యానించినా సమయం సరిపోదు.

పురాణాలు వేదాలలో చెప్పిన యుగాలు అన్నీ పక్కనబెడితే  చరిత్రకారులు పరిశోధకులు వేసిన లెక్కల్ని పరిగణనలోనికి తీసుకుంటే రామాయాణంలో చెప్పబడిన కథంతా  క్రీస్తు పూర్వం 11000 నుండి 7000 ఏళ్ల క్రితం  జరిగినట్లుగా భావించవచ్చును.

ఆశ్చర్యకరమైన విషయం ఏమిటంటే ప్రపంచంలో వేర్వేరు ప్రాంతాలలో  వేర్వేరు భాషలలో

వేర్వేరు విధాలుగా సుమారు 11000 కి పైగా రామాయణం వ్రాయబడింది. ఒకే విషయంమీద

ఇన్ని గ్రంథాలు బహుశా ఇప్పటిదాకా వచ్చి ఉండవేమో. ఇంకా గమ్మత్తైన విషయం ఏమిటంటే

ఒక్కొక్క కవిదీ ఒక్కొక్క కల్పన, ఒక్కొక్క శైలి , ఒక్కొక్క వర్ణన . ప్రతీ కవికీ వేర్వేరు పాత్రలు నచ్చాయి. ఆ పాత్రలను ఉన్నతంగా వారి రచనల్లో చూపించారు . ఈ కావ్యంలోని పాత్రలకు

వారివారి ప్రవృత్తికి తగినట్లుగా పేర్లు పెట్టడం మామూలు విషయం కాదు. శ్రీరాముని నరావతారంగా చూపించినందువలన ఇందులోని  పాత్రలలో  సద్గుణాలనూ దుర్గుణాలనూ అన్నింటినీ వేర్వేరు పాళ్ళలో నింపారు వాల్మీకి మహాముని.

     శ్రీరామచంద్ర మూర్తిలాంటి నాయకుడు దొరికాడని అయోధ్యలోని ప్రజలూ అలాగే కోట్లాది వానరులు అనుకున్నప్పటికీ నేను నా కోణంలో చూస్తూ కాస్త భిన్నంగా అనుకుంటాను.

సకల విద్యాపారంగతుడు , దివ్యాస్త్రబలసంపన్నుడు , తపోనిధి , బ్రహ్మఋషి అయిన విశ్వామిత్రుడు లభించడం శ్రీరాముని అదృష్టం. 

           సాధారణంగా  బిడ్డలను విడిచిపెట్టి తల్లి ఉండలేదు. కానీ తనను అడవులకు వెళ్ళమని  చెప్పలేక శోకించి , ఆతనిపై బెంగతో రామా రామా అంటూనే ప్రాణాలు విడిచిన ప్రేమమూర్తి “దశరథుడు” తండ్రిగా లభించడం రాముని భాగ్యం.

               నడిచే దారిలో రాళ్ళు ఉంటాయో , ముళ్లుంటాయో అని కూడా ఆలోచించకుండా

సకల భోగభాగ్యాలతో పెరిగిన ఎండకన్నెరుగని రాకుమారి తన భర్త వెంట  అడవులకు వెళ్ళిపోయింది . ఎన్నో కష్టాలను ఓర్చుకొని ,లోకానికి తాను పవిత్రనని నిరూపించేందుకు

అగ్నిప్రవేశం చేసిన సీతవంటి సాధ్వీమణి భార్యగా లభించడం శ్రీరాముని భాగ్యం.

      ఒకే తల్లికి పుట్టకపోయినా అనుక్షణం నీడలా వెన్నంటి ఉండి తన ప్రాణాలను పణంగా పెట్టి

ఇంద్రుని జయించిన ఇంద్రజిత్^కి ఎదురునిలిచి పోరాడిన సౌమిత్రి , వనవాసం చేసినన్ని రోజులూ అన్నగారి పాదుకలనే రాజుగా భావిస్తూ పరిపాలన సాగించిన భరతుడు...ఇలాంటి సోదరులు  దొరకడం ,  నిజంగా శ్రీరాముని భాగ్యమే. 

                తనకు ఉన్న శత్రువు అన్న వాలిని సంహరించిన సాయానికి కోట్ల సంఖ్యలో ఉన్న

తన సేనను అంతటినీ శ్రీరాముని సేవకి సమర్పించిన మిత్రుడు సుగ్రీవుడు లభించడం నిజంగా శ్రీరామునికి వరమే కదా.

         కేవలం ఐదు రోజుల్లో నూరు యోజనాల సముద్రంపై వారధిని నిర్మించిన అపర విశ్వకర్మ నలుడు శ్రీరామునికి చేసిన సాయాన్ని తక్కువ చేయలేము.

               ఇక ఆఖర్న చెప్పడానికి ఒక్కరు ఉన్నారు. ఆయన ఎవరై ఉంటారనే సందేహం ఎవ్వరికీ రాదు ... రాకూడదు కూడా. వజ్రదేహుడు , బుద్ధిశాలి , అపరిమితమైన పరాక్రమ సంపన్నుడు , ఇంకా చెప్పాలంటే రామాయణానికి రెండో నాయకుడు అయిన హనుమంతుడు.

ఇక్కడ రెండో నాయకుడు అనడానికి కారణాలు చెప్పడం మొదలుపెడితే మరో చిన్న రామాయణం అయిపోతుంది బహుశా. సుందరకాండ మొత్తానికి నాయకుడు సుందరుడైన హనుమంతుడే కదా. ( ఇక్కడ మనోసౌందర్యం తీసుకోవాలి దేహ సౌందర్యం కాదు ) .

800 మైళ్ళ సాగరాన్ని లంఘించడం మొదలుకొని లంకలో వేలాది రాక్షసులను వధించి

లంకాదహనం చేసి ,(రావణునికి వానరమూకల బలాన్ని పరిచయించే ప్రయత్నం.)సీతాదేవికి ధైర్యవచనాలు చెప్పడం. యుద్ధసమయంలో సంజీవనీ పర్వతాన్ని తీసుకొచ్చి లక్షలాది ప్రాణాలను కాపాడడం ఇవన్నీ చూస్తుంటే హనుమంతుడే రామాయణం ... రామాయణమే హనుమంతుడు అనిపించడంలో ఆశ్చర్యం లేదు .

        ఒక సన్నివేశాన్ని వివరిస్తే ఆయన బలం ఏమిటన్నది అందరికీ  ఇంకా బాగా అర్ధమౌతుంది.  ఇంద్రజిత్తు పరాక్రమానికి వానరులంతా క్షతగాత్రులై పడి ఉన్నప్పుడు

నాగపాశాలతో రామలక్ష్మణులు బందీలైపోయినప్పుడు జాంబవంతుడు శ్రీరాముడిని

అడుగుతాడు “ హనుమ ఎక్కడ ఉన్నాడు “ అని . శ్రీరాముడు ఆశ్చర్యపోతాడు .ఎవ్వరినీ అడగకుండా  హనుమంతుడి గురించి ఎందుకు అడుగుతున్నావు అని తిరిగి ప్రశ్న వేస్తాడు.

ఎవ్వరూ లేకున్నా హనుమ ఉంటే చాలు లంకనే కాదు ముల్లోకాలనూ జయించవచ్చును అని.

 

                        అలాంటి హనుమంతుడు సేవకునిగా లభించడం శ్రీరామచంద్రమూర్తి భాగ్యమని అందరూ ఒప్పుకొని తీరాల్సిందే.

 “దేవ దేవం భజే  దివ్య ప్రభావం 

రావణాసుర వైరి  రఘు పుంగవం రామం 

దేవ దేవం  భజే దివ్య ప్రభావం 

రాజవర శేఖరం  రవికుల సుధాకరం 

ఆజానుబాహుం  నీలాద్రికాయం 

రాజారి కోదండ  రాజ దీక్షా గురుం 

రాజీవలోచనం  రామచంద్రం  రామం 

దేవదేవం భజే దివ్య ప్రభావం ..... “

ఇక్కడ రావణాసుర వైరిని గురించి మాట్లాడతాను. అన్ని లోకాలనూ

లోక పాలకులనూ అష్టదిక్పాలకులనూ గడగడలాడించిన మహా పరాక్రమశాలి రావణాసురుడులాంటి వైరి లభించడం నిజంగా రాముని

భాగ్యమే.

           ఉపమా కాళిదాసస్య అని మహాకవి కాళిదాసుని అంటారు.

అలాంటి మహాకవి సాగరానికీ , ఆకాశానికీ , రామరావణ యుద్ధానికీ

ఉపమానాలు లేవన్నాడు. వాటికి అవే ఉపమానాలు అన్నాడాయన. అంతటి మహాసంగ్రామంలో గెలిచినందుకే శ్రీరాముడు ఆచంద్రార్కం కీర్తించబడుతూనే ఉంటాడు.

దీనిని మాయలు మంత్రాలు ఏమీ లేవనుకొని ఒక పెద్ద నవల అనుకొని చదవండి. దీనిలోని పాత్రలను పరిశీలిస్తే నాకు ఒక అద్భుతమైన విషయం

కనబడింది. ఇందులో ఏ పాత్రా కూడా ద్వంద్వ ప్రవృత్తిని కలిగి ఉండలేదు.

ఒకచోట ఒకలా మాట్లాడడం వేరే చోట వేరేలా మాట్లాడడంలాంటి సన్నివేశం ఎక్కడా కనబడదు. దుష్టులైతే దుష్టులుగానే కనబడతారు .సజ్జనులైతే సజ్జనులుగానే కనబడతారు. దుష్టులంటే ఇక్కడ ఒక విషయం ఉటంకించి తీరాలి .

హనుమంతుడు రావణుని అంతఃపురంలో  రావణుని చూసినప్పుడు దూరంగా ఉండే చూస్తాడు. దానికి ఒక కారణం ఉంది

నీతిశాస్త్ర పారంగతుడైన హనుమకి

“శకటం పంచహస్తేషు దశహస్తేషు వాజినమ్

గజం సహస్ర హస్తేషు దుష్టం దూరేన వర్జయేత్” అని తెలుసు .

( శకటానికి ఐదు మూరలదూరంలోనూ , రథానికి పదిమూరల దూరంలోనూ

  ఏనుగుకి  వేయి మూరలదూరంలోనూ , దుష్టునికి వీలైనంత దూరంలోనూ ఉండాలన్నమాట)

        రామాయణ కావ్యాన్ని ఎవరు రాసినదేనా చదవండి. వాటిలోని కల్పనలను అన్నిటినీ చదవండి . కానీ వాల్మీకి మహర్షి రచించిన శ్లోకాలు

తాత్పర్యాలతో ఉన్న మూలం ఏదైతే ఉన్నదో దానిని చదివితేనే మీకు

మనం సీరియల్స్^లోనూ సినిమాలలోనూ చూస్తున్న గాథలు ఏవైతే ఉన్నాయో వాటిలో మూలంలో ఉన్నవి ఏవో , మూలంలో లేనివి ఏవో మీకు సులువుగా తెలిసిపోతుంది.  

      { మూలం ఏదైతే ఉన్నదో అవి తెలుగులో శ్లోకం అర్ధంతో గీతాప్రెస్ వారు మూడు భాగాలలో విడుదల చేసారు .

గీతాప్రెస్ గోరక్ పూర్ వాళ్ళ షాప్ ( no 41 , 4-4-1 , dilshada plaza )

సుల్తాన్ బజార్ , హైదరాబాద్ లోనూ

సికిందరాబాద్ రైల్వే స్టేషన్ ప్లాట్ ఫారం -1 లోనూ దొరుకుతాయి .

అన్ని వాల్యూమ్స్ కలిపి 500 నుంచి 600 రూపాయలలో దొరికేస్తాయి.

ఇద్దరు మల్టీప్లెక్స్^లో సినిమా చూసి పాప్కార్న్ తిన్నంత ఖర్చు అన్నమాట }

       యత్ర యత్ర రఘునాథ కీర్తనం, తత్ర తత్ర కృతమస్తకాంజలిం,

        బాష్పవారిపరిపూర్ణ లోచనం, మారుతిం నమతః రాక్షసాంతకం. _/\_ @శ్రీ 

                  

|| భామలలో భామ ...సత్యభామ ||

పదునాలుగు లోకాలలో లేని సౌందర్యనారి. 
రాజసం ఉట్టిపడే రాకుమారి
పూలకి సౌకుమార్యం నేర్పే సుకుమారి.
మాధవునికి అత్యంత ప్రియమైన దేవేరి.


భక్తిలో రుక్మిణికి తీసిపోదు
ప్రేమలో రాధకి పోటీదారు.
క్రిష్ణుని చేతిలో శృతి కావాలనుకొనే రతనాల వీణ
కన్నయ్యని కొంగున కట్టుకొని వెంటతిప్పుకున్న నెరజాణ
అలుకకే అలుకలు నేర్పిస్తుంది.
అనంగరంగంలో అ రతీదేవిని తలపిస్తుంది.

అస్త్రశస్త్ర విలువిద్యా కౌశలం ఆమెకి అదనపు బలం
అందుకే...పదారువేల ఎనమండుగురిలో సత్య స్థానం ప్రత్యేకం.

యుద్ధానికి సై అన్న సత్యభామ జగానికి చండిక
నరకుని దృష్టిలో కాళిక
కన్నయ్యకి మాత్రం కర్పూరకళిక.

నరకునిపై నిప్పులు కక్కిన కన్నులు
కన్నయ్య వైపు మధ్య మధ్య ప్రేమగా చూసే వెన్నెలదొన్నలు
విల్లెత్తిన రౌద్రరూపం
నరకునికి కాలుని పాశం.
మాధవునికి మాత్రం ధనువు పట్టిన శృంగార చాపం.

సాత్రాజితి శౌర్యం ముందు
నరకుని క్రౌర్యం తల దించుకుంది
కృష్ణునితో కలిసి లోకకంటకుని సంహారంలో
సత్యభామ తన పాత్ర విజయవంతంగా పోషించింది ...@శ్రీ

కృత్రిమ బంధమేల?

మదనుని విల్లు 
దొంగిలించి 
కనురెప్పల నారి సారించి 
నీ నేత్రాలు వదిలే 
సుమశరమ్ములకి 
ఎపుడో సమ్మోహితుడిని చేసావ్! 

నీ బాహులతల 
అల్లికతో 
నీ కౌగిలి చెరసాలలో 
రోజూ ఖైదీగా బంధిస్తావ్! 

నీ చూపు 
నీ మాట...
నీ హొయలు 
నీ సొగసు
నీ ప్రేమ...
నీ అలుక 
ఇన్ని ఆయుధాలలో 
ఏ ఒక్కటి ప్రయోగించినా 
ఈ సత్యాపతి కాదంటాడా?

చెంత 
మన్మథుని కొరడా లాంటి 
నీ వాలు జడ ఉండగా 
ఈ పట్టు పగ్గమేల?

నీ ప్రేమకే బందీని అయిన 
నాకు ఈ కృత్రిమ బంధాలేల?
నేనుండేది నీతోనే...
నీనడిగేది నీ తోడే...
నీ మదిలో దాగి ఉన్న 
నా మనసునడిగి చూడు 
నీకే తెలుస్తుంది...
నా మాటల్లో ఉన్న నిజమెంతో?
నీమీద నాకున్న ప్రేమెంతో?                  @శ్రీ 

యా దేవీ సర్వ భూతేషు

"శైల పుత్రి" గా ఉద్భవించావు. 

హిమవంతునికి తనయవయ్యావు...

శివుని కోరి తపమాచారించావు.

అకుంఠిత దీక్షతో "బ్రహ్మచారిణి" వైనావు...

దశ హస్తాలతో...దశాయుధాలతో దర్శనమిచ్చావు.

"చంద్రఘంట"వై చల్లగా చూసావు...

అష్ట సిద్ధులు నవనిధులు ఇచ్చే మాతవైనావు.

అష్టభుజివై..."కూష్మాండ" వై  కొలువు తీరావు... 

షణ్ముఖునికి జన్మనిచ్చి  "స్కందమాత"వైనావు.

ఆ రూపంతో కాళిదాసుని కరుణించిన అమ్మవైనావు...

త్రిమూర్తుల తేజస్సునే తీసుకున్నావు.

లోకహితం కోరి  "కాత్యాయని"గా అవతరించావు...

తంత్ర సిద్ధులు కోరే  తాంత్రికుల దేవతగా మారావు...

అనుచర గణాలతో  "కాళరాత్రి"వై పూజలందుకున్నావు...

వేల ఏళ్ళ  ఘోరతపానికి నల్లబడినావు..

శివుని స్పర్శతో గంగ శుద్ధితో "మహాగౌరి"వైనావు...

శివుని అర్చనకు నోచుకున్నావు...

అష్టాదశ సిద్ధులను అనుగ్రహించి "సిద్ధిధాత్రి "వైనావు...

పదవనాడు  భక్తుల పాలిటి విజయదుర్గవైనావు...

"విజయదశమి"నాడు విజయోత్సాహాన్ని పంచావు...

"యా దేవీ సర్వ భూతేషు శక్తి రూపేణ సంస్థితా...

నమస్తస్యై నమస్తస్యై నమస్తస్యై  నమో నమః"                @ శ్రీ   

    

గణేశ శరణం...శరణు గణేశా...

అయోనిజుడవు నీవు...

తల్లి ప్రేమతో ప్రాణం 

పోసుకున్న నలుగు పిండి బొమ్మవు నీవు...

తల్లి రక్షణకు ప్రాణమిచ్చిన

మాతృ వాక్పరిపాలకుడవు నీవు...

తల్లిదండ్రులే  విశ్వరూపమని 

తెలియజెప్పావు నీవు...

కుశాగ్ర బుద్ధితో తొలిపూజ 

అందుకుంటున్న వేలుపు నీవు...

ప్రకృతికి  దగ్గరగా ఉండమన్నది నీ పూజ...

ఫల పుష్ప పత్రాదుల పూజకి అదే అర్థం... 

నేడు కృత్రిమ రసాయనాల సమ్మేళనం

నీ మూర్తి నిర్మాణం...

జలాలను చేస్తున్నారు  కలుషితం...

ముందు తరాలకు మిగులుస్తున్నారు

ప్రదూషిత పర్యావరణం...

అంతా యోచించండి...

మట్టి గణపతులనే అంతటా ప్రతిష్టించండి...

ప్రకృతికి దగ్గరగా ఈ ఉత్సవాలను జరుపుకోండి...   @శ్రీ 

శృంగారార్చన???

                                 

                                         (నేను చేసిన ఈ వీడియో తిలకించండి.)

                                            
ఆసనం ఎందుకు?

    క్రీడాపర్వతం ఉండగా...

అర్ఘ్య పాద్యాలెందుకు?

    ఎదురుగా యమున ఉందిగా...

ధ్యానం వేరే యెందుకు?..

   ఎపుడూ నీ ధ్యానమేగా...

పుష్పం కావలెనా?

    నీ హృదయ కుసుమం ఉందిగా...

పత్రం ఎందుకు?

    శతపత్ర దళ నేత్రాలుండగా...

స్నానమెందుకు?

   నీ వలపుల జల్లు ఉందిగా...

అక్షతలెందుకు?

   క్షతం కాని నీ ప్రేమ ఉండగా...

చామరమెందుకు?

   నీ నీలి కురుల వింజామర ఉందిగా...

మధుర  గీతాలు వద్దు.. 

   నీ మాటల సంగీతాలే చాలు...

అగరు పొగలు వద్దు..

   విరహపు సెగలే చాలు... 

శ్రీ చందనాలు వద్దు...

   నీ మేని పరిమళమే  చాలు 

 పంచామృతాలు వద్దు...

   నీ  పెదవుల మధువులు చాలు...

నైవేద్యం వద్దు...

   నీ సాన్నిధ్యం చాలు...

ఘంటారావాలు వద్దు...

   నీ కాలి అందెల సవ్వడులే చాలు...

మంగళ తూర్యారావాలు వద్దు...

   నీ రతనాల మొలనూలు తాళమే మేలు..

నీరాజనం వద్దు... 

  నా రాధ హా'రతులు' చాలు......

స్వస్తి వాచకం వద్దు...
  క్రియల పునరావృతమే నీ మాధవునికి ముద్దు...

( శ్రీ కృష్ణాష్టమి సందర్భంగా...అష్టమి నాటి జన్ముడు,

అష్ట భామల నాథుడు...అష్టైశ్వర్య ప్రదాత....అయిన 

ఆ దేవదేవునికి నేను అర్పించుకొనే అష్ట కవితా సుమార్పణంలో 

సహకరించి  ప్రోత్సహించిన బ్లాగ్ మిత్రులకి కృతఙ్ఞతలు సమర్పిస్తూ..

అందరినీ చల్లగా చూడాలని ప్రార్థిస్తూ...

ఈ కవితాసుమాంజలిని శృంగారమూర్తులైన రాధాకృష్ణులకు

నీరాజనంగా సమర్పించుకుంటున్న ' శ్రీ ' )

రాధా మోహనం

నా ఎదుట నీవున్నట్లు

నా ఎదలో నీవు కదిలినట్లు

నీతో నేను నడిచినట్లు

నీ నీడలో నేను  కలిసినట్లు

నీ పిలుపు మంజీరనాదమై మ్రోగినట్లు....

నీ మురళీరవం నా చెవికి సోకినట్లు

నా ఒడిని నీవు చేరినట్లు..
నా కలలో నీవు కరిగినట్లు...

నా శ్వాస వేగమైనట్లు...

నా పరువం నాకే భారమైనట్లు....

పారిజాతాలు గడ్డిపూలైనట్లు...

గరిక పానుపు ముళ్ళ పానుపైనట్లు...

బృందావనం కంటకవనమైనట్లు...

చంద్రుడే మండినట్లు..చీకటే నవ్వినట్లు....

అష్ట భార్యలు నిన్ను చుట్టుముట్టినట్లు...

గోపికలంతా నీ చెంత ఉన్నట్లు...

నన్నసలు నీవు తలవనట్లు...

నీకోసం పరితపించె  నా హృదయం...

నీకోసం వేచి చూసె నా నయనం...
నీకు తెలియదు కు'మారుడు' పంచప్రాణాలు తీస్తున్న వైనం...


ఊహలలోనే......

నా కంఠముక్తావళి నీ గుండెలపై జారె...
నీ నుదుట కస్తూరి నా ఎదపై కరిగె...
నీ శిఖపింఛము నా మెడను నిమిరె...
నీవు నా సిగ్గులు దోచె.. నా  విరహం తీర్చె


హత్తుకొనె...నా మనసును నీ మనసు...
లీనమయ్యె నీరాధ..తన మాధవునిలో...

భామ! సత్యభామ!

రుక్మిణికి ఇచ్చినది 

శచీంద్రుని నందనోద్యాన పారిజాతం 

నీకేపుడో ఇచ్చేసినది 

సత్యేంద్రుని మనోవన పారిజాతం.

నను వరించి వచ్చిన 

వనితామణులు ఆ ఏడుగురు.

దివ్యమణితో లభించిన 

షోడశకలానిధివి నీవు.

నీ శౌర్యం... 

అణచింది నరకుని క్రౌర్యం 

రౌద్ర రసంలోనూ తొణికింది

నీ అపురూప సౌందర్యం....

నీతో ప్రణయం 

తుషార బిందు మాలికామయం

నీతో కలహం 

మృగ మరీచికా సమూహం... 

నీ వలపు వీక్షణలు 

మదనుడెక్కుబెట్టిన శృంగార అస్త్రాలు..

నీ కోపపు చూపులు

గరళం పూసిన కరకు శరాలు...

మీరను నీ యానతి...

దాటను నీవు గీసిన గీత...

కోపాగ్నికి ఎర్రబడిన నీకు...

వెన్నముద్దలు తిని, 

నవనీతభరితమైన 

నా అధరపు మధువే లేపనం...

నీ మెత్తని పాదంతో మొదలు పెట్టనీ...

మెల్లగా హద్దులన్నీ దాటనీ...

నీ అలుకలు తీరేదాక...

నా బిగికౌగిలిలో ఒదిగే దాక...