ప్రేమలేఖలు రాయటం మళ్ళీ మొదలెట్టవూ?

ప్రియా!

నీ ప్రేమలేఖ లోని అక్షరాలు

సుగంధాలు విరజిమ్మే నందనవన పారిజాతాలు,

నిశ్చలమైన నా మనోకాసారంలో 

వికసించిన  ప్రేమారవిందాలు.

పత్రంలోని భావాలు హరివిల్లు లోని సప్త వర్ణాలైతే,

అ రంగుల దారాలతో కలనేసిన చీరకట్టులో 

నీవున్నట్లే అనిపిస్తుంది ...నా కళ్ళెదుట.

పదాల వెంట పరుగులు తీసే కళ్ళకంటే,

నా మనసే వేగంగా చదువుతుంది...

నీ మనసులోని ప్రతి తలపును.

నీ లేఖలు....

మనసును కమ్ముకున్న చీకటి మేఘాలను 

చెల్లాచెదురు చేసే వెన్నెల కిరణాలు....

వలపు తాపాలను చల్లార్చే మంచు తుఫానులు....

మదిలోనికి  చొచ్చుకోనిపోయే  మదనుని  శర పరంపరలు....

అందుకే అడుగుతున్నాను..

నా మనసు మెచ్చే...

నీ మనసుకి నచ్చే...  

ప్రేమలేఖలు  రాయడం మళ్ళీ మొదలెట్టవూ?  

                                                                        @శ్రీ