గణేశ శరణం...శరణు గణేశా...

అయోనిజుడవు నీవు...

తల్లి ప్రేమతో ప్రాణం 

పోసుకున్న నలుగు పిండి బొమ్మవు నీవు...

తల్లి రక్షణకు ప్రాణమిచ్చిన

మాతృ వాక్పరిపాలకుడవు నీవు...

తల్లిదండ్రులే  విశ్వరూపమని 

తెలియజెప్పావు నీవు...

కుశాగ్ర బుద్ధితో తొలిపూజ 

అందుకుంటున్న వేలుపు నీవు...

ప్రకృతికి  దగ్గరగా ఉండమన్నది నీ పూజ...

ఫల పుష్ప పత్రాదుల పూజకి అదే అర్థం... 

నేడు కృత్రిమ రసాయనాల సమ్మేళనం

నీ మూర్తి నిర్మాణం...

జలాలను చేస్తున్నారు  కలుషితం...

ముందు తరాలకు మిగులుస్తున్నారు

ప్రదూషిత పర్యావరణం...

అంతా యోచించండి...

మట్టి గణపతులనే అంతటా ప్రతిష్టించండి...

ప్రకృతికి దగ్గరగా ఈ ఉత్సవాలను జరుపుకోండి...   @శ్రీ 

గానామృత సామ్రాజ్ఞి

నీవు గళం విప్పితే...

కోకిలలు సిగ్గు పడతాయి...

ఇంత చక్కని గొంతు 

మాకు లేదెందుకని...

చిలుకలు చిన్న బుచ్చుకుంటాయి 

ఆ పలుకుల  తీయందనం... 

మా సొంతమెందుకు  కాలేదని...

'సరిగమలు' నీ గొంతులో 

కొత్త విన్యాసాలు చేస్తాయి...

శాస్త్రీయ బద్ధమైన నృత్యాలే చేస్తాయి...

తాము వ్రాసిన కీర్తనలు 

సార్థకం అయినందుకు 

ఆనందపడతారు 

అన్నమయ్య,  త్యాగయ్యలు 

ఎన్ని పాపాలు చేసినా 

గంగలో ఒక్క స్నానంతో 

పోయినట్లు...

అర్థం కాని భాషతో...

చెవులు బద్దలయ్యే రణగొణ ధ్వనుల 

సంగీత నేపధ్యంలో 

కర్కశంగా పాడే పాటలు  విన్న చెవులు...

అమృతప్రాయమైన  నీ గానంతో 

పరిశుద్ధమౌతాయి...

తిరిగి మంచి సంగీతం వినేందుకు 

సన్నద్ధమౌతాయి...

(సంగీత సామ్రాజ్ఞి  భారతరత్న ఎమ్మెస్ సుబ్బలక్ష్మి గారికి సమర్పితం).....@శ్రీ 

తనలోనే దాచేసుకుంటుందిగా ఈ వర్షం!...

గ్రీష్మ తాపాలకు వేడెక్కి 

నింగి నుండి జారే ప్రతి చినుకుని 

ఒడిసి పట్టుకోవాలనే ప్రయత్నంలో...

తలమునకలై ఉంది
ప్రకృతిలోని ప్రతి కణం...

రాత్రనక..పగలనక,

చేసిన తపస్సు ఫలించి 

వరం పొందిన వసుంధర 

పులకరించి పరవశిస్తోంది...

వేసవి వేడికి చిక్కి, శల్యమై

నెమ్మది నెమ్మదిగా సాగరుని వైపు 

పయనించే నదీ నదాలు...

మేఘమిచ్చిన జలోత్సాహంతో

వడివడిగా తమ ప్రియతముని

చేరాలని వేగిర పడుతున్నాయి...

ఎందరికో సంతోషాన్నిచ్చే ఈ వర్షం...

నాకు ఎందుకు  ఇష్టమో,

నిత్యం...వర్షంకోసం 
ఎందుకు ఎదురు చూస్తానో

తెలుసా నీకు?

నీకోసం 
నా కనులు చిందించే 

దుఃఖాశ్రువులను 
పరుల కంట పడనీయక

తనలోనే  దాచేసుకుంటుందిగా
ఈ వర్షం!...                                         @శ్రీ 

                                                                   

తనువే...తాంబూలం

తమలపాకు... నీ అరచేతి కోమలంతో  పోటీ పడింది...

మౌక్తికం... నీ ముక్కెరకి నేనే సరిజోడు అంది...

కస్తూరి... నీ నుదుట తిలకమై వెలిగింది...

యాలకుల  సుగంధం...
నీ శ్వాసలో ఒదిగింది...

జవ్వాది... 
నీ యవ్వనంలో అమరింది...

పోకచెక్క... 
నీ నాభిలో చక్కగా ఇమిడింది...

కర్పూరం...
నీ అందానికి నీరాజనమంది...

తాంబూలపు పంట...
నీ పెదవిపై మెరిసింది...

బొటనవేలి  చిలుక - బాహులతలతో అల్లుకుంది...

చూపుడువేలి చిలుక - చనువు తీసుకొమ్మంది...

మధ్యవేలి చిలుక - మధ్య గాలిని చొరనీయనంది...

ఉంగరపువేలి చిలుక - నాతో ఉండిపొమ్మంది...

చిటికెనవేలి చిలుక - సిగ్గులొలికిస్తూ...
    'ఇకచాలు' అనే మాటే లేదంది...
(ఈ రోజు ఎవరి బ్లాగ్ లోనో  ఈ చిత్రం చూసి అల్లిన భావమాలిక....@శ్రీ)

తస్మైశ్రీ గురవే నమః

అమ్మలా  లాలించావు 

నాన్నలా బుజ్జగించావు...

ఓనమాలు నేర్పించావు... 

అక్షరాలు దిద్దించావు..

మా  అల్లరిని  భరించావు...

మా  తుంటరితనాన్ని తట్టుకున్నావు...

సున్నితంగా మందలించావు...
బెత్తంతో బెదిరించావు...

తెలుగా? ఆంగ్లమా? అని భేదం లేదు...

విజ్ఞానమా? భూగోళమా? అని తేడా లేదు...

అన్నీ నీకు కొట్టిన పిండి...

నీతి కథలు చెప్పడంలో విదురుడివి..

లెక్కల చిక్కులు విప్పడంలో నేర్పరివి...

చిత్రలేఖనంలో నిపుణుడివి..

నాలో విద్యను మలిచిన  అక్షర శిల్పివి. 

సకల విద్యా స్త్రాలను  ప్రసాదించిన విశ్వామిత్రుడివి.

లక్ష్యసాధనలో  వెన్ను తట్టిన ద్రోణుడివి.

నిరక్షరుల పాలిటి 'అక్షరశ్రీ' నీవు.
అజ్ఞాన తిమిరాన్ని పారద్రోలిన  'జ్ఞానజ్యోతి'వి నీవు.
అంతే కాదు...
మానుషరూపం దాల్చిన 'వాణీతేజమే' నీవు.

(సెప్టెంబరు 5 - ఉపాధ్యాయుల దినోత్సవం సందర్భంగా నా గురువులకు 
 అక్షర నివాళి....ఉపాధ్యాయ వృత్తిలో ఉన్న మిత్రులందరికీ శుభాకాంక్షలు )

అదే...అదే...అదే...

రవి కిరణం...

ముకుళించిన 
అరవిందాన్ని

వెచ్చగా స్పృశిస్తూ...

చెప్పేది...

చల్లని వెన్నెల... 

కొలను లోని 
కలువబాలను 

మెత్తగా తాకుతూ...

రహస్యంగా 

చెప్పేది....

నదీనదాలు... 

తమ వయ్యారపు  
వంపుసొంపులు 

చూపుతూ...

తమ ప్రియుని చేరే వేళ 

గలగలలాడుతూ 
చెప్పేది...

నురుగుల తరగ...

వడి వడి నడకలతో

ఉత్తేజంగా కదులుతూ 

తీరాన్ని తాకుతూ

చెప్పేది...

కరిమబ్బు...

మెరుపు తీగల 

వెలుగులతో 

నిశను ఝల్లున తాకుతూ

చెప్పేది...

పరిమళ భరిత

మకరందాన్ని గ్రోలుతూ

మత్తెక్కిన భ్రమరం..

విరికన్యకు తీయగా 

చెప్పేది...

ఆర్తిగా నోరు తెరిచిన
ముత్యపు చిప్పలో 
జారుతూ... ముత్యమయ్యే 
స్వాతి చినుకు చెప్పేది....

అనుక్షణం...

నా మనసు నీ మనసుకు 

చెప్పేది...
అదే....అదే...అదే..

కృతజ్ఞతాంజలి.

నాకు చిన్నపుడు  అక్షరాభ్యాసం చేసిన 

శ్రీ కందుకూరి శ్రీరామచంద్రమూర్తిగారి

పాద పద్మములకు శిరసు వంచి నమస్సుమాంజలి అర్పించుకుంటున్నాను... 

నీవు చదువుకునే రోజుల్లో ఏవేవో వ్రాసేవాడివి కదా...ఇపుడు మళ్ళీ వ్రాయవచ్చుకదా! 

అంటూ ఈ బ్లాగ్ మొదలు పెట్టడానికి ప్రోత్సహాన్నిచ్చిన బాల్య మిత్రులకు ప్రత్యేకమైన 

కృతజ్ఞతాంజలి. 

పూజ్యులు శ్రీ రాజారావు ,శ్రీ శర్మ ,
శ్రీ శ్యామల రావు,శ్రీ సుధామ

శ్రీ /శ్రీమతి/కుమారి ...

( తగిన సంబోధన వారి పేర్ల ముందు తగిలించుకొనవలసినదిగా  ప్రార్థన.) :-)

సుబ్రహ్మణ్యం,భాస్కర్,ఫాతిమా,జలతారు వెన్నెల,యోహంత్,రమేష్ 

పద్మ, రాజి ,మధురవాణి ,సృజన, ప్రేరణ , ప్రిన్స్ ,anrd,అనుపమ 

హర్ష,అనికేత్, ఆనంద్ ,భారతి, వీణ ,శ్రీలక్ష్మి,లిఖిత,కృష్ణప్రియ,సాయి, 

చిన్ని ఆశ, నాగేంద్ర ,వనజ వనమాలీ,సీత,కే.ఆనంద్ ,మానస కిరణ్ ,

లక్ష్మీ దేవి, రసజ్ఞ  , మోహన్ , కే క్యూబ్ వర్మ ,రవి శేఖర్ ,ఫణీంద్ర 

మంజు, జ్యోతి ,మాలా కుమార్ ,వాసుదేవ్ , ఫణి, అక్షర కుమార్ , 123 

మీరంతా నేను వ్రాసిన టపాలను మీ సమయం వెచ్చించి చదివి 

మీ అభిప్రాయాలను తెలియజేస్తూ...

ప్రతి టపాకూ ముందంజ వేయమని ప్రోత్సాహాన్ని అందించి నందుకు...

(స్పందనలు తెలియజేసిన వారి పేరు ఎవరిదైనా మిస్ అయితే మన్నించాలి)

ధన్యవాదాల సుమాంజలి....

అలాగే...స్పందన తెలియ జేయక పోయినా...

నా టపాలను చదివిన అందరు బ్లాగ్ వీక్షకులకూ,

నా బ్లాగ్ ఫాలో  అవుతున్న మిత్రులందరికీ నా 

హృదయపూర్వకమైన ధన్యవాదాలు తెలియజేస్తున్నాను.

అలాగే నా బ్లాగ్ ని చేర్చుకున్న 

కూడలి...మాలిక...హారం...బ్లాగర్స్ వరల్డ్ లకు కూడా 

నా హృదయపూర్వకమైన ధన్యవాదాలు తెలియజేసుకుంటున్నాను.

నేను ఇతరుల బ్లాగ్ లలో చేసే వ్యాఖ్యల వలన  గానీ,

నా ప్రతిస్పందనల వలన గానీ,

ఎవరైనా నొచ్చుకుంటే....క్షంతవ్యుడిని...

అవి కేవలం స్నేహ పూర్వకంగానే తీసుకొమ్మని ప్రార్థన...

నేను చూసే బ్లాగ్ లలో కొన్ని చూసినపుడు నాకు అనిపించే భావాలు మీ ముందు ఉంచాలనుకుంటున్నాను...

నాకు నచ్చే విషయం:

ఏ బ్లాగ్ లో నైనా ఆ టాపిక్ పూర్తిగా చదివి 

దానికి తగిన వ్యాఖ్యని ఇవ్వటం...

వారిని ప్రోత్సహించేలా..అది ఎవరి స్పందనైనా కావచ్చు...

నాకు నచ్చని విషయం: 

1.వ్యాఖ్యకి "టపా వ్రాసిన వారు"కాకుండా "వేరే వారు ఆ వ్యాఖ్యకి సమాధానం ఇవ్వడం."

2.వ్యాఖ్య  చేసేటపుడు సభ్యతని మరచి స్పందించడం..

3. టపా వ్రాసిన వారిని ఉద్దేశపూర్వకంగా ఎద్దేవా చేయటం...

అవహేళన చేయటం...అమర్యాదపూర్వకంగా వ్యాఖ్యానించడం...

నా అభిప్రాయాలను మీ అందరితో పంచుకుంటున్నాను ఇలా...

మీ ఆదరణ, అభిమానం, స్నేహం, ప్రోత్సాహం మున్ముందు కూడా ఇలాగే ఉంటుందని ఆశిస్తూ 

మీ మిత్రుడు