స్వార్ధం

వేకువ చీకటిని చీల్చే క్షణంలో

మంచుతెరలను తొలగిస్తూ 

నీ నుదుటిని తాకే తొలికిరణం 

నేనే కావాలనుకొనే స్వార్ధం నాది.

నిదుర లేచిన నీ కనులు 

మొదట చూసే దృశ్యం 

నా ముఖమవ్వాలనుకొనే స్వార్ధం నాది.

నీ తడికురులు నా పెదవులపై 

చేసే లాస్యంతో 

మేలుకోవాలనే స్వార్ధం.నాది.

కన్ను తెరిచి మబ్బుకమ్మిన 

మచ్చలేని చందమామను 

ఉదయాన్నేచూడాలనే 

స్వార్ధం నాది.

చక్కర కలిపిన తేనీటికి

తేనెల మాధుర్యం తోడుగా 

నిత్యం నాకందించాలనే స్వార్ధం నాది.

ఈ కుందనపు బొమ్మనొదిలి 

ఏ కొమ్మతో ఉన్నావో ?

అనే అపనమ్మకపు మాటల్లో

తొణికిసలాడే ప్రేమను 

నేనే అవ్వాలనే స్వార్ధం నాది.

ప్రతి రాత్రి నీ చెవి నా గుండెసవ్వడి వింటూ 

నీతల నా ఎదనే తలగడగ చేసుకోవాలనే 

అందమైన స్వార్ధం నాది.

నీ ప్రతి ఆనందానికీ కారణం నేనే కావాలనీ 

ఎ చిన్ని బాధకూ కారణం నే కారాదనీ 

కోరుకునే స్వార్ధం నాది.

నా ప్రేమలోని నిస్వార్ధాన్ని నువ్వెప్పుడూ గుర్తిస్తూ 

నీ ప్రేమనంతా  నేనే పొందాలనే 

నిస్వార్ధమైన స్వార్ధం నాది.

(నా బ్లాగ్ లోని కవితలను ఆదరించిన అందరికీ హృదయపూర్వక ధన్యవాదాలు...అభివాదాలు.మీ వలెనే నేను ఎదిగింది.అందుకే నన్ను ప్రోత్సహించిన మిత్రులకి అందరికీ నా వ్రాతలు అంకితం.)...@శ్రీ 

కౌగిలింత

కౌగిలింత అంటే...

ఆకుపచ్చని తీగ పైకి పాకుతూ 
పందిరిలోని ప్రతి కర్రనూ 
ఆధారంగా చేసుకుంటూ
అల్లుకుపోవడమే.

ఉరుముతోనే పుట్టినా 
ఆ గర్జనకు భయపడుతూ
పరుగుపరుగున వచ్చి 
నల్ల మేఘాన్ని
మెరుపుతీగ 
చుట్టుకోవడమే.

పున్నమి వెలుగుల్లో 
మెరిసే తరగలు 
వడివడిగా ముందుకి కదులుతూ
ఎగసి పడుతూ
తీరాన్ని కమ్మేసుకోవడమే.

స్వాతిచినుకు కోసం 
ఆర్తిగా ఎదురు చూస్తూ
చినుకు పడిన వెంటనే 
ముత్యంగా మారకముందే 
తుళ్ళిపోతుందనే భయంతో 
చిప్పల మూతలతో 
బంధించేయడమే...

కన్నులు తెరిచి నిన్నే చూస్తూ 
నీ రూపాన్ని టక్కున పట్టేసి 
కనుపాపల్లో దాచేసుకుంటూ
రెప్పల చేతులతో 
నిను కదలనివ్వక బంధించేదే... 

నిన్న నీ తోడైనాను, 
నేడు నీ నీడైనాను,
రేపు నీతోనే ఉంటాను 
అంటూ ప్రతినిత్యం 
నిన్నల్లుకునే 
కాంక్ష లేని నా ప్రేమపాశమే... ...@శ్రీ

ప్రేమ ప్రేమ ప్రేమ

ఆకాశం ఔన్నత్యంతో పోటీ పడేది ప్రేమ.

పృథ్వికున్న క్షమతో సమానంగా నిలబడేది ప్రేమ.

అగ్నిశిఖలా ప్రజ్వలించేది ప్రేమ.

శీతల సమీరంలా స్పృశించేది ప్రేమ.

జలధితరంగంలా ఎగసిపడేది ప్రేమ.

పంచభూతాల సమాహారం ప్రేమ...

కంటికి నచ్చిన వారిని కన్నుల్లో నింపుకొనేది ప్రేమ.

చెవికి ఇంపైన మాటలు ఎప్పుడూ వినాలనిపించే భావం ప్రేమ.

పెదవులు తీయగా ఆ పేరునే పిలవాలనిపించడమే ప్రేమ.

ఒకరి ఊపిరిని మరొకరు శ్వాసించేది ప్రేమ.

నచ్చినవారి వెచ్చని స్పర్శను మళ్ళీ మళ్ళీ కోరుకొనేది ప్రేమ.

పంచేంద్రియాల ఏకత్వం ప్రేమ... 

ఊదాలోని సున్నితత్వం ప్రేమ.

నీలిమందు (వర్ణం)లోని నిజాయితీ ప్రేమ.

నీలిరంగులోని నమ్మకం ప్రేమ.

హరితంలోని  ప్రకృతి ఆరాధన ప్రేమ.

పసుపులోని సృజనాత్మకత ప్రేమ.

కెంజాయలోని ధనాత్మకత ప్రేమ.

ఎరుపురంగులోని ఉత్తేజం ప్రేమ.

హరివిల్లులోని అన్నివర్ణాలు కలిసిన శ్వేతవర్ణమంత స్వచ్చమైనది ప్రేమ.

ప్రేమికుల మనసులో... 

నిరంతరం వెలిగే  'అఖండజ్యోతి' ప్రేమ.

ప్రేమికుల భావగీతి ప్రేమ.

ప్రేమికులు ఉన్నా లేకున్నా ఈవిశ్వంలో శాశ్వతంగా నిలిచిపోయేది ప్రేమ....@శ్రీ 

అందాలతో వేట

లేడిని వేటాడ వచ్చా

,
లేడి కనుల చినదానికి చిక్కా

.
త్రుటిలో సింహం తప్పించుకుంది,

సింగపు నడుము చిన్నది దొరికింది.

చేతనున్నవి సుమాలు

,చూపులు మాత్రం.

..

పంచ బాణుని శరాలు

,
ముదిత వదిలే ముద్గరాలు,

  
తలోదరి వేసే తోమరాలు

,
భామిని ప్రయోగించే భల్లాలు.

  

తనువంతా అందాల అతిశయాలు

.
సౌందర్యాల జలపాతాలు 

,
ప్రకృతికి ప్రతి రూపాలు,

లావణ్యానికి నెలవులు

.

వేటాడదామని వచ్చా 

,
నీ అందాలచే వేటాడ బడ్డా... @శ్రీ

ఓ ప్రేమలేఖ..

                                               శ్రీ ||ఓ ప్రేమలేఖ...||

ఏయ్ కన్నా!

          నీ తలపుల పరిమళాలతో నిండిన నా హృదయానికి నీకు  లేఖ ఎలా రాయాలో , యేమని వ్రాయాలో తెలియక తికమక పడుతున్న నా మనోభావాలకు అందాల రూపం ఇచ్చింది నీవే.నాలో మెదిలే భావాలకు అక్షర రూపం ఇవ్వలేక అవస్థపడుతున్న నా కలంలో వలపుసిరా నింపి  నాకు అందించింది నువ్వే కదరా...

       నీ కన్నుల్లో మెదిలే కల నేనై ఉండాలనిపిస్తుంది... నీ యెద కనుమల్ని తాకే   వలపుల సంద్రపు అల నేనై అవ్వాలనిపిస్తోంది...కోటి జన్మలకైనా నీకై వేచి ఉండే అభిసారికనై , నీ మది వాకిట రంగ వల్లినై ఉండిపోవాలని , నీ హృదయ ద్వారానికి  బంగరు తోరణమై మెరిసిపోవాలని, చెరగని చెలిమికి నే సాక్షాన్నై మిగిలి పోవాలని ఆశ పడుతున్నా

           కలవై నువ్వు నన్ను కలవర పెడుతుంటే, కలత నిదురతో నా కనురెప్పలు వాలిపోతుంటే , నీ రాక కోసం కళ్ళలో కోటి ఆశలతో ఎదురుచూస్తోంది నీ బంగారు. ..నీ పేరులో ఏమైమరపు ఉందొ ఏమో...నాలో నేనే కన్నా ..అంటూ పిలుచుకున్నా  వళ్ళంతా ఎదో తుళ్ళింత...మదిలో ఎదో అలజడి... నీపేరు నెమ్మదిగా పలికేది పెదవులైతే మనసెందుకో మరి చిన్నగా సిగ్గుపడుతుంది?నా పేరు నీ నోటినుంచి  వినగానే గుండెల్లో పన్నీటి జల్లులు కురిసినట్లు..... హిమఖండం  కరిగి గల గల మనే సరిగమల శబ్దాలతో జారినట్లు... వళ్ళంతా ఒకటే పులకింతలు, మది కోవెల గంటలను సుతారముగా మ్రోగిస్తున్నట్లు ఏదో తెలియని తీయని గిలిగింత... ఇది ప్రేమేనంటావా?

   కంతుడు.. వసంతుడు... జయంతుడు నీ అందం ముందు వెలవెల బోతారని అందాల తారాదీపం నీవని ...ఇంతటి అందగాడు నావాడవుతున్నాడని  మదిలో ఎంత మురిసిపోతున్నానో నీకేం తెలుసు? పండువెన్నెల్లో , పచ్చదనాల పూతోటల్లో ఆడే అందాల వెన్నెల కన్యకనై... నీ కావ్య నాయిక నేనై ...తిలక్ అక్షరంలా కౌముది కన్యకనై నీ వొడిలో సేదదీరాలని అలసిన నానుదుట ఓ తీపిసంతకం నీ పెదవి కానుకగా ఇవ్వాలని యెంత ఆశ పడుతున్నానో తెలుసా?  మనసంతా నీ దగ్గర జారవిడిచి ప్రాణం మాత్రం ఉన్న బొమ్మను నేనై ఎదురు చూస్తున్నా. నా మనోహరా తొందరగా వచ్చేయవూ?

                మా పెరటి పూబాలలు ఆశతో ఎదురు చూస్తున్నాయి, తమ రేఖా కుసుమాల తివాచీపై నడచి వచ్చే నీ పాదాలను తనివి తీరా ముద్దాడాలని ,

నా ప్రియ నేస్తాలు ..చిలుక,కోకిల,మైనా, ఆత్రం గా వేచి ఉన్నాయి నీకు సుస్వర స్వాగతాలు పలకాలని , నీ కమ్మని , తీయని స్వరంతో జత కలిపి పాడాలని .

          నీ చిత్రం నా పక్కన చూసి  నెల రాజెందుకో ఈర్ష్య పడి చూస్తున్నాడు చూడు... ఈ మచ్చ లేని వన్నెల చిన్నెల  వెన్నెల రాజు నీకెలా సఖుడయ్యాడో అని ? నిన్ను  పక్కన చూసి పూలతోపులను  అల్లరి చేసే పిల్లగాలుల సైతం నన్ను కూడా తాకి కలవర పెడుతుంటే , ఉలికి పడి వెతుకుతుంది , నా మనసు నా నీడగా మారిన నీ  కోసం . పాలరాతిని సైతం ప్రతిబింబించే నీ ఛాయను స్పృశించాలని , నీ నవ్వుల తెల్లదనాలను తమ సొంతం చేసుకోవాలని సిరిమల్లెలు  ఎంత ఆరాట పడుతున్నాయో తెలుసా?

            నా ప్రతి తలపులో నువ్వు ..నా ప్రతి ఊహలో నువ్వు ...నీలి మబ్బులోన నీ నీడను చూసి నెమలిని నేనై నర్తిస్తున్నా ...నా  నల్లని కురులను నా ముని వేళ్ళతో చేయించే నాట్యం కోసం ఎదురు చూస్తునా...ఏయ్ కన్నా!నాకు సిగ్గేస్తోంది తెలుసా? ఇలా నేను వ్రాసినవన్నీ నువ్వు చదువుతూ అక్షరాలను గుచ్చే చూపులు భావయానం చేసి నన్ను తాకేస్తాయో ఏమిటో?...అక్కడికీ ..అల్లరిచేసే మనసుకి నీ మాటలు చెప్పి బుజ్జగించి నిద్రబుచ్చే ప్రయత్నం చేస్తూనే ఉంటాను.నీ మాటలు విని మరింత చెలరేగి వాటితో పాటు నన్ను కూడా జాగారం చేయించేస్తాయి.నీకోసమే నామనసుకు వయసోచ్చిందని నీకెలా చెప్పేది?...చిన్నప్పుడే శృంగార నైషదం  చదివేసానన్నావు...మరి నావిరహాన్ని  గుర్తించడంలో   ఎందుకో  ఆలస్యం చేస్తున్నావు...నీ మనసు నా మనసుతో ఏడడుగులు వేసేసినట్లే అనిపిస్తోంది...చేతికి పెట్టిన గోరింట పంట చూస్తానంటూ ఆ ఎర్రదన్నాన్ని నీ పెదవుల కెంపులతో కోసేసి...వళ్ళంతా...ఆ ఎర్రదనం పాకిన అనుభూతిని ఎలా మరచిపోగలను చెప్పు...చేతి రేఖలు చూస్తానంటూ నీ చేతిలోకి చొరవగా నా చేతిని తీసుకున్నపుడే అనుకున్నాను నీతో పాణి గ్రహణం అయిపోయిందని...

            ఒక్క క్షణం కన్ను మూసుకుంటే...అమ్మో... ఏ కొమ్మతోనైనా ముచ్చట్లాడడం లేదు కదా!..అని ఫోన్ చేస్తే కాల్ వెయిటింగ్ వస్తుంటుంది...నే కోపంలో ముక్కున ఉన్న ముక్కెర ఎగరేసే లోపే...కాల్ చేసేసి కొమ్మలేందుకు?..అనుక్షణం ప్రేమవృక్షం నీడన నీ ఊహల ఊడలలోనేగా నన్ను నీవు ఊయలలూపేది  అంటూ నా కోపాన్ని క్షణాల్లో పోగొట్టేస్తావు...ఏయ్ కన్నా!...ఐ మిస్ యు రా...నీ తీయని మాటలకు,చిలిపి సందేశాలకు పుట్టిన వంట్లోని ఆవిరులకు వెన్నెల కూడా వైద్యం చేయలేక చేతులెత్తేసింది...శ్రీ చందనం వ్రాసుకున్నా క్షణాల్లో పొడి పొడిగా రాలిపోతోంది...ఇప్పుడు నీ మాటలకి...వ్రాతలకే  ఇలా సిగ్గు పడిపోతుంటే,,,అమ్మో! రేపు నేను నీదాన్నయ్యాక నీ అల్లరి ఎలా తట్టుకుంటానో ఏమిటో?...

               నీవు నన్ను చూసి నచ్చుకొని...మెచ్చుకొని వెళ్ళిన ప్రతిక్షణం నుంచే నా మనసు నీ రాక కోసం ఎదురు చూడటం మొదలు పెట్టింది.

I LMN U (LOVE YOU...MISS YOU...AND NEED YOU...)...నామనసుని నామాట వినకుండా చేసిన నిన్ను...నీలో ఉన్న నా మనసు ఊరికే వదలదులే...నన్ను త్వరగా నా నుంచి తీసుకు  పోవూ!

నీ రాక కోసం నిలువెల్ల కనులై .....

                                                                                  నీ బంగారు...                                                      

మోస్తూనే ఉంటావు.

పుట్టినపుడు

'అయ్యో ...ఆడపిల్లా!' 

అనే లోకం నిట్టూర్పులు మోసావు...

వైవాహిక జీవితంలో

మెట్టినింటి 

బరువు బాధ్యతలు మోసావు... 

బిడ్డను ప్రసవించడానికి 

గర్భంలో నవమాసాలు 

నీ చిన్నారిని మోసావు...

పిల్లల వెంట వారి 

పుస్తకాల సంచులు 

మోసావు...

ఇల్లు గడవక 

బైట (పని) బరువులు 

మోస్తున్నావు...

ఆఖరికి "నీ బరువు"

మరో నలుగురు మోసేదాకా...
జీవితాంతం 

ఏదో  ఒకటి మోస్తూనే ఉంటావు...

నీ చూపులు...

ప్రేమగా  నా కళ్ళలోకి  

చూసే లోతైన  చూపులు 

చిరుకోపంతో  చురుక్కుమంటూ

గుచ్చే  చూపులు

మదన  శరాలను   సానపట్టి

సంధించే  చూపులు 

తలుపు  వెనుకనుంచి

ఓరగా  చూసే  చూపులు 

నా  గుండెని  తాకే

వెన్నెల  తూపుల  చూపులు 

సిగ్గుతో  నా  వంక  చూస్తూ

నా మనసు దోచే చూపులు 

సాయం  సంధ్యలో  నాకోసం

వేచి  చూసే  చూపులు 

ఆలస్యమైతే  చూసే

వాడి  వేడి చూపులు

నన్ను   గారంగా

పూలతీగలా అల్లుకునే  చూపులు ...

నేను  అలిగితే 

నను  ప్రసన్నం  చేసుకునే  చూపులు

నను అలరించే  చూపులు 

నను  కవ్వించే  చూపులు 

నన్నారాధించే 

అర్థనిమిలీత  నేత్రాల చూపులు

నా మది వాకిలిలో 

రంగవల్లులేసిన చూపులు.

ప్రియ సమాగమంలో 

సిగ్గుతో స్వీట్ నథింగ్స్ చెప్పే చూపులు 

నిశ్శబ్ద సంగీతమాలపించే చూపులు

మది వేణువుని పలికించే చూపులు 

నా హృదయం భేదించిన చూపులు.

మన ప్రేమకి మూలమైన చూపులు.

మన బంధాన్ని శాశ్వతం చేసిన చూపులు.                        @శ్రీ