29/05/2012

అమ్మా...నీకోసం...


నవమాసాలు మోసి ఉత్కృష్టమైన 
 మానవ జన్మనిచ్చిన నీవు...
 వెండి గిన్నెలోని పప్పుబువ్వను ప్రేమగా 
 గోరుముద్దలు చేసి తినిపించిన నీవు...









పిడుగుపాటుకి ఉలిక్కిపడితే
అక్కున చేర్చుకొని అర్జునా! ఫల్గునా! అనే నీవు...
అలారం కొట్టక  ముందే 
కాఫీ కప్పుతో నన్ను నిద్రలేపే నీవు...



                                                 
వేసవి వేడిలో నీవు మేల్కొని 
నన్ను నిద్రబుచ్చుతూ విసనకర్ర వేసే నీవు...
చలి కాలపు రాత్రులలో మాటిమాటికీ 
కంబళి సరిగా కప్పే నీవు...





పరీక్షలకి చదువుతున్నపుడు 
పెరుగన్నపు ముద్దతో నీవు...
క్లాసులో ఫస్టు వచ్చినపుడు 
పాయసపు పాత్రతో గుమ్మం లోనే ఎదురయ్యే నీవు...



                                       


నాకు విష జ్వరమొచ్చినపుడు  
నాతో బాటు పథ్యం చేసిన నీవు...
నాన్న కొట్టిన దెబ్బలకి
వెన్న పూస్తూ ఓదార్చే నీవు.....






ఇంత వయసు వచ్చినా,
కాస్త నలతగా ఉందంటే చాలు
గంటకోసారి దిష్టి తీసే నీవు...






ఈరోజు నీవు నా చెంత లేకున్నా
నీ ప్రేమ, మమత ,క్షమ 
అన్నీ నాకు రక్షగా ఉన్నాయి...




ఉదయం లేచినపుడు... నా ఎదురుగా...
రోజంతా నా నీడలో ...
రాత్రి నిదురించేటపుడు... స్వప్నంలో...
కనిపిస్తూనే ఉంది కమ్మని మా 'అమ్మ జ్ఞాపకం'




(ప్రాణం కంటే మిన్నగా పెంచిన అమ్మమ్మకు,
గత సంవత్సరం ప్రాణాంతకపు వ్యాధికి బలి అయిపోయిన మా అమ్మకు,
ప్రేమతో...) 

17 comments:

  1. అద్భుతమయిన వ్యక్తీకరణ! మధురమయిన జ్ఞాపకాలను గుర్తుచేస్తూ చివరలో కంట తడి పెట్టించింది.

    ReplyDelete
    Replies
    1. మీకు నా మనోభావాలు నచ్చినందుకు
      చాలా ధన్యవాదాలు...రసజ్ఞ గారూ!

      అన్నట్లు మీకు కందుకూరి శ్రీరామ చంద్ర మూర్తి గారు (కాకినాడ) తెలుసా?
      ఆయన గురించి మీ ద్వారా ఒక ఆర్టికల్ పోస్ట్ చేయించాలని ఉందండీ!
      ..@శ్రీ

      Delete
  2. అమ్మ జ్ఞాపకాలు వెన్న మీగడలు, వెన్నెల తరకలు. అమ్మను గుర్తు చేసుకునే సంస్కారవంతమైన కొడుకులున్న అమ్మలు ధన్యులు , అమ్మకు , అమ్మమ్మకు , ఆత్మా శాంతి చేకూరాలని కోరుకుంటున్నాను శ్రీ గారూ

    ReplyDelete
    Replies
    1. మీ ప్రశంసకి ధన్యవాదాలు ఫాతిమా గారూ!
      మీరు కోరినట్లే ,నేను కూడా వారి ఆత్మశాంతికై
      మరోసారి ఆ దేవుని వేడుకుంటున్నాను...
      @శ్రీ

      Delete
  3. అమ్మమ్మ కూ, అమ్మ కూ ఆత్మ శాంతి ప్రసాదించాలని కోరుకుంటూ
    వాళ్ళ ప్రేమని గుర్తుచేసుకుంటూ ఆ భావనలు ఈ కవితలో మాతృప్రేమ అంత తియ్యగా చెప్పారు.

    ReplyDelete
    Replies
    1. మీ స్పందనకు...
      చాలా ధన్యవాదాలు చిన్నిఆశ గారూ!
      @శ్రీ

      Delete
  4. యెంత ఎదిగినా ,ఎన్ని ఉన్నా "అమ్మ" ఉంటే బిడ్డకి ఎప్పుడు అని ఉన్నట్టే ! మీ అక్షరాలలో..మా తృ ప్రేమ పెల్లుబికింది. ఆ ప్రేమ మిమ్మల్ని మును ముందుకు నడిపిస్తుంది.
    కీప్ ఇట్ అప్ !!
    బాగా వ్రాసుకున్నారు. "అమ్మ" గుర్తుకొచ్చే లా"

    ReplyDelete
    Replies
    1. మీరన్నది నిజమే...
      ఎంత ఎదిగినా తల్లికి వాళ్లింకా పసిపిల్లల లాగే కనిపిస్తారు..
      మీ ప్రోత్సాహానికి ధన్యవాదాలు వనజగారూ!
      @శ్రీ

      Delete
  5. శ్రీ గారు. మీకు చాలా చాలా థాంక్స్.అమ్మ మీద కవిత ఎప్పుడు రాస్తారా అని ఎదురుచూసా! As usual చాలా బాగుంది! You express yourself so well. ధన్యవాదాలండి మీకు.

    ReplyDelete
  6. వెన్నెలగారూ!
    మీ బ్లాగ్ లో చిత్రాలకి స్పందించినపుడు,
    మీ ప్రతి స్పందన చూసినప్పటినుంచీ వ్రాయాలనుకున్నా
    వ్రాయలేకపోయాను...
    23 వ తేదీ రాత్రి 01 :30 కి నిద్ర రాక అమ్మ గుర్తొచ్చి కేవలం 10 నిముషాల్లో వ్రాసుకున్న కవిత ఇది.
    (సరిగా అదే రోజుకి ఆవిడ కాలం చేసి సంవత్సరం అయింది)...
    అడగగానే చిత్రాలు అందించినందుకు మీకు బోలెడు ధన్యవాదాలు..
    కవితని మీరు మెచ్చినందుకు మరోసారి ధన్యవాదాలు..
    @శ్రీ

    ReplyDelete
  7. శ్రీ గారు
    మాతృప్రేమ మాధుర్యాన్ని మరింతగా ముందుంచారు ..!!
    చాలా బాగా రాసారు అండీ..!!
    అమ్మమ్మ కూ, అమ్మ కూ ఆత్మ శాంతి ప్రసాదించాలని కోరుకుంటూ...

    సీత..

    ReplyDelete
  8. మీకు కవిత నచ్చినందుకు బోలెడు ధన్యవాదాలు సీత గారూ!
    మీరు అన్నట్లుగా వారి ఆత్మకి శాంతి కలగాలనే
    మరోసారి కోరుకుంటున్నాను నేను కూడా...
    @శ్రీ

    ReplyDelete
  9. This photo is taken from the calendar "MAA"
    To view more images like this visit
    http://multygraphics.com/calendar/maa-hindi

    ReplyDelete
  10. thank you very much for putting good pictures in ur blog...
    if i need i'll take the pictures...
    once again thanks for ur kind concern..
    @sri

    ReplyDelete
  11. God Bless you - dont have words

    ReplyDelete
  12. http://www.facebook.com/groups/mother.prema

    ReplyDelete
  13. ప్రతిమనిషి జీవితంలో అమ్మ ప్రాముఖ్యత
    మీరు రాసిన కవితలో ఉంది
    అలాగే నేడు అమ్మలకు ఇంతటి ప్రాధాన్యత
    బిడ్డలు ఇవ్వడంలేదు వందకి ఓ పదిమంది తప్ప

    హృదయాన్ని తట్టిలేపే మదురమైన జ్ఞాపకాలను
    గుర్తుచేశారు...!చివరన కళ్ళలో నీటిపొరనూతెప్పించారు

    ❤💙🙏🙏🙏🙏🙏

    ReplyDelete