27/09/2016

|| ఉన్నదోయి - తెలుగు గజల్ ||






పాదాలకు పట్టుదలను పూయాలని ఉన్నదోయి
గమ్యాలకు వందనాన్ని నేర్పాలని ఉన్నదోయి

ద్వేషంతో రగులుతున్న వారిని గాలించాలి 
వలపుచువ్వతో వాతలు పెట్టాలని ఉన్నదోయి

ముడిరవ్వలతో సమమే భాషలోని అక్షరాలు 
సద్భావముతోటి సానపెట్టాలని ఉన్నదోయి

మమతకన్న త్వరితంగా మదిలోపల పెరుగుతుంది 
అహంకారమనే కలుపునేరాలని ఉన్నదోయి

ప్రబలుతున్న హింసచూసి కన్ను చెమ్మగిల్లుతోంది
విశ్వశాంతి నెలకొంటే చూడాలని ఉన్నదోయి

మూఢభక్తులందరికీ కొత్తదారి చూపాలి
మానవతకు ఒక కోవెల కట్టాలని ఉన్నదోయి

ప్రేమశరములన్నిటినీ సంధిస్తూ "నెలరాజా" 
పగలకు గాయాలెన్నో చేయాలని ఉన్నదోయి




23/09/2016

|| చేయగలదు(దూ) - తెలుగు గజల్ ||



చందమామే వెలుగుతుంటే చీకటేమిటి చేయగలదు(దూ)
అమావాస్యే కోపగిస్తే వెన్నెలేమిటి చేయగలదు(దూ)

నిన్ను నీవే ఆయుధంగా మలచుకుంటూ సాగిపోవలె
బెదిరిపోయే వైరి పట్టిన శస్త్రమేమిటి చేయగల(దు)దూ

నిదురపోతే ఆలసించక చెంగుచెంగున వాలిపోదా 
రెప్పలార్పని కన్నులుంటే  స్వప్నమేమిటి చేయగల(దు)దూ

పట్టుదలతో అడుగులేస్తే గమ్యమే తల వంచుతుంది 
కాలుకదపని మనుషులుంటే బాట ఏమిటి చేయగల(దు)దూ

మనువు చెప్పిన మాటలన్నీ ఈ యుగానికి పనికిరావు  
కులములన్నీ ఒక్కటైతే శాస్త్రమేమిటి చేయగలదూ

స్వయంశక్తిని నమ్ముకుంటే భాగ్యమంతా నీదికాదా 
బ్రహ్మరాతలతోటి నిండిన ఫాలమేమిటి చేయగల(దు)దూ

కలియుగంలో అసత్యాలే రాజ్యమేలును  "ఓ నెలరాజ"
సాక్షులందరు అమ్ముడైతే  న్యాయమేమిటి చేయగల(దు)దూ

22/09/2016

|| తెలియలేదు - తెలుగు గజల్ ||








|| తెలియలేదు - తెలుగు గజల్  ||

కనులలోన మాయలెన్నొ ఉంటాయని తెలియలేదు 
చూపులతో  మంత్రమేదొ వేస్తావని తెలియలేదు 

తెలతెల్లని మల్లెలకై తీవెలెన్నొ తడిమాను 
నీ నవ్వుల తోటలలో(తోటలోన) పూస్తాయని తెలియలేదు 

పూలలోన మధువుందని నేటివరకు భ్రమించాను 
అధరాలను చిలుకుతుంటె పుడతాయని తెలియలేదు 

రెప్పలపై తీపివాన పడుతుంటే కొత్తగుంది
తేనెలున్న కలలమబ్బు కురిసిందని తెలియలేదు 

తపిస్తున్న గుండెలలో చల్లదనం చేరినది 
విరహాగ్నిని ప్రేమజల్లు తడిపిందని తెలియలేదు

జన్మలుగా మనం కలిసి ఉండడమొక చిత్రమే 
కాలమనే హంసకూడ(రాజహంస) ఓడిందని తెలియలేదు 

వెన్నెలతో పోటీపడు వెలుగేదో "నెలరాజా"
నను అల్లిన మేనిలోన విరిసిందని తెలియలేదు 

( నెలవంక నెమలీక మాసపత్రికలో  ప్రచురించబడిన గజల్ ) 



20/09/2016

|| శాంతికపోతాలెపుడూ ఎగురుతూనె ఉండాలీ - తెలుగు గజల్ ||







శాంతికపోతాలెపుడూ ఎగురుతూనె ఉండాలీ  
వైరులు పన్నిన వలలను తెంచుతూనె ఉండాలీ 

తెగువను చూపాలంటే చల్లదనం పనికిరాదు 
వీరుల రక్తము ఎపుడూ మరుగుతూనె ఉండాలీ 

పదికి బదులు వేయి తలలు నరికి తెచ్చి చూపాలీ 
యోధులలో పౌరుషాగ్ని రగులుతూనె ఉండాలీ  

సూచీముఖ వ్యూహంతో మున్ముందుకి సాగాలీ 
ప్రత్యర్ధుల దళాలన్ని చీల్చుతూనె ఉండాలీ 

కంచెదాటి ఒక్క అడుగు దేశంలో పడకూడదు
హద్దునుండి శత్రువులను తరుముతూనె ఉండాలీ

నిప్పులుకక్కే క్షిపణిగ ఒక్కొక్కడు మారాలీ 
యుద్ధంలో పగవారిని కూల్చుతూనె ఉండాలీ 

విజయోత్సాహం నిండిన కనులలోన "నెలరాజా"
దేశభక్తి పొంగిపొంగి పొర్లుతూనె ఉండాలీ  

|| నాపాక్ ఇరాదోంకా రక్షా (సమర్ధన్) కరనే వాలే .... ||







దేశభక్తి మీకూ ఉండాలి
మాకు ఉన్నట్లే ...
మా దేశాన్ని రక్షించే సైనికులకు ఉన్నట్లే ...

ఆయుధాలు మీకూ ఉండాలి 
దాడి చేస్తే తిప్పికొట్టడానికి...
శత్రువులని హతమార్చడానికి

యుద్ధనీతి అనేది మీకూ తెలియాలి 
నిద్రిస్తున్న వారిమీద కత్తిదూయకూడదని
అమానుషంగా వాళ్ళ పీకలు కోయకూడదని

మీకూ కొన్ని నిజాలు తెలియాలి
ముఖాముఖీ తలపడితే 
నీ దేశం ఓ బూడిదకుప్పగా మారిపోతుందనీ 
"నాపాక్ ఇరాదోంకా దేశ్" సర్వనాశనమైపోతుందనీ.

నువ్వు నీ నేతలూ తెలుసుకోవాలి 
శాంతికాముకత్వంతో ఉన్నప్పటికీ
మా దేశపు రక్షకులు ఆయుధం పడితే 
శత్రువుని నరకానికి పంపిగానీ వదలరనీ
ఒక్కొక్కడూ నిప్పులుగక్కే  ఓ గైడెడ్ మిస్సైల్^తో సమానమని
శత్రువుల గుండెల్ని చీల్చే కరవాలంతో సమానమని

ఈరోజునుంచీ భయపడడం నేర్చుకో... 
18మంది పోతేనే 18 అక్షౌహిణులకంటే
 బలమైన సేనాబలం యుద్ధానికి సంసిద్ధమైతే .... 
నరికిన ఒక్కో తలకూ బదులుగా వేయి తలలే తెగుతాయో ?
ఒక్కొక్కరికి ఒకో లక్ష చొప్పున 
యుద్ధభూమిలో ప్రాణాలు వదులుతారో ?

ప్రేమకు బదులు ప్రేమను ఇచ్చే దేశంలోని
 ప్రజలంతా నపుంసకులనుకుకోకు
ఒక్కసారి అంతా కలిసి పిడికిలి బిగిస్తే...
నేలకూలిన నీ దేశపు సైనికులకు 
సమాధులు కట్టడానికి చందాలు వసూలు చేసుకోవాలి.

18/09/2016

|| కావాలా - తెలుగు గజల్ ||




|| కావాలా - తెలుగు గజల్  || 

హృదయవీణ నాదాలకు రసరాగం కావాలా 
మనసులోని గీతాలకు అనునాదం కావాలా

మధుమాసం రాగానే పూలమీద వాలతాయి 
భృంగకాల బృందాలకు ఆహ్వానం కావాలా

చెలి నవ్వుల బాణాలకు పదునెంతో చెప్పలేను 
తిమిరాలను నరికేందుకు కరవాలం కావాలా

వివాహాన్ని నిలిపేందుకు ప్రేమసూత్రమే చాలును 
బంగారంతో చేసిన శతమానం కావాలా

జగతిలోని అందరికీ పంచుతూనె ఉంటాను 
నా ప్రేమను తూచేందుకు కొలమానం కావాలా

ప్రేయసి తనువున వన్నెలతో పోటీ పడలేదు 
వర్ణాలను చూపేందుకు హరిచాపం కావాలా

 కనులుకనులు కలుసుకున్న కాలంలో "నెలరాజా"
 ఇరువురి మధ్యన వేరే సంవాదం కావాలా

17/09/2016

|| పడిపోయా - తెలుగు గజల్ ||





తొలిసారిగ నిన్నుచూసి ప్రేమలోన పడిపోయా 
నవ్వగానె  మల్లెపూల  లోయలోన పడిపోయా  

నీ చూపుల తూపులతో మదినిండా వెన్నెలలే 
చీకట్లను ముంచుతున్న వాకలోన పడిపోయా.

పూవిల్తుని బాణాలకు ఎదురు నిలువలేను కదా
శృంగారపు  హద్దులున్న  కోనలోన  పడిపోయా

సమ్మోహన అస్త్రాలకు నా తనువే లక్ష్యమైంది
కోరుకున్న పరవశాల సీమలోన పడిపోయా 

చీకటిలో చిచ్చురేపు పున్నమిలా నీవుంటే 
నెలరాజా కాంతులున్న సోనలోన పడిపోయా #శ్రీ

15/09/2016

|| చూపలేవు - తెలుగు గజల్ ||








తూఫానుని ఎదిరించే కెరటాలను చూపలేవు 
ఉప్పెనతో పోరాడని తీరాలను చూపలేవు

నరుకుతున్న మానవులకు ఏ శిక్షా వేయవూ 
ఉపకారం  చేయనట్టి  వృక్షాలను చూపలేవు 

శాంతికాముకులమంటూ నేతలు చెబుతుంటారు 
సైన్యాలను పెంచుకొని దేశాలను చూపలేవు 

మలినమైన ఏ హృదయం మునకలతో శుద్ధికాదు  
పుణ్యనదులు కడుగుతున్న పాపాలను చూపలేవు 

ఆ దేవుని మించినట్టి  చిత్రకారుడున్నాడా 
పుడమికాంత పూసుకోని వర్ణాలను చూపలేవు 

ఆరోహణమున్నచోట అవరోహణముంటుందీ 
ఒకే స్థాయిలో సాగే రాగాలను చూపలేవు

కురవాల్సిన చోటునొదిలి ఎక్కడనో కురుస్తాయి 
రైతుల కళ్ళను తుడిచే మేఘాలను చూపలేవు  

తూరుపుకడుపును చీల్చుకు బైటికి వస్తుంటాయి
నెత్తుటి స్నానం చేయని కిరణాలను చూపలేవు  

చీకటిలో అణువణువూ పున్నమిలో తడుస్తుంది 
నెల'రాజేయని' శీతలధూపాలను చూపలేవు #శ్రీ. 







14/09/2016

|| గుర్తున్నది – తెలుగు గజల్ ||










మొదటిసారి నిన్నెప్పుడు చూసానో గుర్తున్నది
నా మనసుకి నీవు ఎపుడు నచ్చావో గుర్తున్నది

చెవులలోన ఆ పిలుపే వినిపిస్తూ ఉంటుంది
జా(శ్రీ)నూ ! అని నన్నెప్పుడు పిలిచావో గుర్తున్నది

ప్రేమజలధిపై వారధి ఇద్దరినీ కలిపినది
మొట్టమొదటి రాయినెపుడు పేర్చానో గుర్తున్నది

అమృతాన్ని తాగుతుంటె చేదుచేదుగా ఉన్నది 
మొదటిముద్దు రుచినెప్పుడు చూసానో గుర్తున్నది

బాసను మరచిన వేళను మది వెలివేస్తున్నది 
చేతిలోన చేయినెపుడు వేసావో గుర్తున్నది

యవ్వనాల ప్రతినిధిగా నీరూపే కనబడింది 
కోర్కెల కళ్ళేనెపుడు వదిలానో గుర్తున్నది

వె(వ)న్నెలవల(తో)లో నన్నే బంధిస్తే “నెలరాజా”
పున్నమితో నిన్నెప్పుడు పోల్చానో గుర్తున్నది

13/09/2016

12 గంటల రికార్డు భక్తి సదస్సు






తిరుమల తిరుపతి దేవస్థానం ఆళ్వారు ప్రాజెక్ట్
మరియు శ్రీ పద్మావతీ మహిళా కళాశాల వారు సంయుక్తంగా నిర్వహించిన
12 గంటల రికార్డు భక్తిసదస్సుకి ఒక పర్యవేకునిగా వెళ్ళడం నా అదృష్టం.
ఈ కార్యక్రమాన్ని  వండర్ బుక్ అఫ్ రికార్డ్ , మరియు తెలుగు బుక్ అఫ్ రికార్డులలో నమోదు చేసారు.
ఆ కార్యక్రమంలో నా ప్రసంగం ఇలా  :

 శ్రీ రామ రామ రామేతి రమే రామే మనోరమే | 
సహస్ర నామతత్తుల్యం రామనామ వరాననే ...
ఆదికావ్యనాయకుడైన శ్రీరామచంద్రమూర్తికి వందనాలు అర్పిస్తున్నాను.

ఆదౌ రామ తపోవనాది గమనం హత్వా మృగంకాంచనం
వైదేహీ హరణం  జతాయుమరణం  సుగ్రీవ సంభాషణం
వాలీ నిగ్రహం  సముద్ర తరణం లంకాపురీ దహనం
పశ్చాద్రావణ కుంభకర్ణ హననం యే తద్దిరామాయణం

ఒకే శ్లోకంలో రామాయణాన్ని చెప్పినప్పటికీ గాయత్రీ మంత్రంలోని ఒక్కొక్క అక్షరానికి ఒక్కొక్క వేయి లెక్కతో  24000 శ్లోకాలతో 537 సర్గలతో ( ఉత్తరరామాయణం ప్రక్షిప్తమని అంటారు పరిశీలకులు )   వాల్మీకి మహర్షి రచించిన రామాయణం గురించి ఎంత వ్యాఖ్యానించినా సమయం సరిపోదు.

పురాణాలు వేదాలలో చెప్పిన యుగాలు అన్నీ పక్కనబెడితే  చరిత్రకారులు పరిశోధకులు వేసిన లెక్కల్ని పరిగణనలోనికి తీసుకుంటే రామాయాణంలో చెప్పబడిన కథంతా  క్రీస్తు పూర్వం 11000 నుండి 7000 ఏళ్ల క్రితం  జరిగినట్లుగా భావించవచ్చును.

ఆశ్చర్యకరమైన విషయం ఏమిటంటే ప్రపంచంలో వేర్వేరు ప్రాంతాలలో  వేర్వేరు భాషలలో
వేర్వేరు విధాలుగా సుమారు 11000 కి పైగా రామాయణం వ్రాయబడింది. ఒకే విషయంమీద
ఇన్ని గ్రంథాలు బహుశా ఇప్పటిదాకా వచ్చి ఉండవేమో. ఇంకా గమ్మత్తైన విషయం ఏమిటంటే
ఒక్కొక్క కవిదీ ఒక్కొక్క కల్పన, ఒక్కొక్క శైలి , ఒక్కొక్క వర్ణన . ప్రతీ కవికీ వేర్వేరు పాత్రలు నచ్చాయి. ఆ పాత్రలను ఉన్నతంగా వారి రచనల్లో చూపించారు . ఈ కావ్యంలోని పాత్రలకు
వారివారి ప్రవృత్తికి తగినట్లుగా పేర్లు పెట్టడం మామూలు విషయం కాదు. శ్రీరాముని నరావతారంగా చూపించినందువలన ఇందులోని  పాత్రలలో  సద్గుణాలనూ దుర్గుణాలనూ అన్నింటినీ వేర్వేరు పాళ్ళలో నింపారు వాల్మీకి మహాముని.

     శ్రీరామచంద్ర మూర్తిలాంటి నాయకుడు దొరికాడని అయోధ్యలోని ప్రజలూ అలాగే కోట్లాది వానరులు అనుకున్నప్పటికీ నేను నా కోణంలో చూస్తూ కాస్త భిన్నంగా అనుకుంటాను.

సకల విద్యాపారంగతుడు , దివ్యాస్త్రబలసంపన్నుడు , తపోనిధి , బ్రహ్మఋషి అయిన విశ్వామిత్రుడు లభించడం శ్రీరాముని అదృష్టం. 

           సాధారణంగా  బిడ్డలను విడిచిపెట్టి తల్లి ఉండలేదు. కానీ తనను అడవులకు వెళ్ళమని  చెప్పలేక శోకించి , ఆతనిపై బెంగతో రామా రామా అంటూనే ప్రాణాలు విడిచిన ప్రేమమూర్తి దశరథుడు తండ్రిగా లభించడం రాముని భాగ్యం.

               నడిచే దారిలో రాళ్ళు ఉంటాయో , ముళ్లుంటాయో అని కూడా ఆలోచించకుండా
సకల భోగభాగ్యాలతో పెరిగిన ఎండకన్నెరుగని రాకుమారి తన భర్త వెంట  అడవులకు వెళ్ళిపోయింది . ఎన్నో కష్టాలను ఓర్చుకొని ,లోకానికి తాను పవిత్రనని నిరూపించేందుకు
అగ్నిప్రవేశం చేసిన సీతవంటి సాధ్వీమణి భార్యగా లభించడం శ్రీరాముని భాగ్యం.

      ఒకే తల్లికి పుట్టకపోయినా అనుక్షణం నీడలా వెన్నంటి ఉండి తన ప్రాణాలను పణంగా పెట్టి
ఇంద్రుని జయించిన ఇంద్రజిత్^కి ఎదురునిలిచి పోరాడిన సౌమిత్రి , వనవాసం చేసినన్ని రోజులూ అన్నగారి పాదుకలనే రాజుగా భావిస్తూ పరిపాలన సాగించిన భరతుడు...ఇలాంటి సోదరులు  దొరకడం ,  నిజంగా శ్రీరాముని భాగ్యమే. 
                తనకు ఉన్న శత్రువు అన్న వాలిని సంహరించిన సాయానికి కోట్ల సంఖ్యలో ఉన్న
తన సేనను అంతటినీ శ్రీరాముని సేవకి సమర్పించిన మిత్రుడు సుగ్రీవుడు లభించడం నిజంగా శ్రీరామునికి వరమే కదా.
         కేవలం ఐదు రోజుల్లో నూరు యోజనాల సముద్రంపై వారధిని నిర్మించిన అపర విశ్వకర్మ నలుడు శ్రీరామునికి చేసిన సాయాన్ని తక్కువ చేయలేము.

               ఇక ఆఖర్న చెప్పడానికి ఒక్కరు ఉన్నారు. ఆయన ఎవరై ఉంటారనే సందేహం ఎవ్వరికీ రాదు ... రాకూడదు కూడా. వజ్రదేహుడు , బుద్ధిశాలి , అపరిమితమైన పరాక్రమ సంపన్నుడు , ఇంకా చెప్పాలంటే రామాయణానికి రెండో నాయకుడు అయిన హనుమంతుడు.
ఇక్కడ రెండో నాయకుడు అనడానికి కారణాలు చెప్పడం మొదలుపెడితే మరో చిన్న రామాయణం అయిపోతుంది బహుశా. సుందరకాండ మొత్తానికి నాయకుడు సుందరుడైన హనుమంతుడే కదా. ( ఇక్కడ మనోసౌందర్యం తీసుకోవాలి దేహ సౌందర్యం కాదు ) .
800 మైళ్ళ సాగరాన్ని లంఘించడం మొదలుకొని లంకలో వేలాది రాక్షసులను వధించి
లంకాదహనం చేసి ,(రావణునికి వానరమూకల బలాన్ని పరిచయించే ప్రయత్నం.)సీతాదేవికి ధైర్యవచనాలు చెప్పడం. యుద్ధసమయంలో సంజీవనీ పర్వతాన్ని తీసుకొచ్చి లక్షలాది ప్రాణాలను కాపాడడం ఇవన్నీ చూస్తుంటే హనుమంతుడే రామాయణం ... రామాయణమే హనుమంతుడు అనిపించడంలో ఆశ్చర్యం లేదు .
        ఒక సన్నివేశాన్ని వివరిస్తే ఆయన బలం ఏమిటన్నది అందరికీ  ఇంకా బాగా అర్ధమౌతుంది.  ఇంద్రజిత్తు పరాక్రమానికి వానరులంతా క్షతగాత్రులై పడి ఉన్నప్పుడు
నాగపాశాలతో రామలక్ష్మణులు బందీలైపోయినప్పుడు జాంబవంతుడు శ్రీరాముడిని
అడుగుతాడు హనుమ ఎక్కడ ఉన్నాడు అని . శ్రీరాముడు ఆశ్చర్యపోతాడు .ఎవ్వరినీ అడగకుండా  హనుమంతుడి గురించి ఎందుకు అడుగుతున్నావు అని తిరిగి ప్రశ్న వేస్తాడు.
ఎవ్వరూ లేకున్నా హనుమ ఉంటే చాలు లంకనే కాదు ముల్లోకాలనూ జయించవచ్చును అని.
 
                        అలాంటి హనుమంతుడు సేవకునిగా లభించడం శ్రీరామచంద్రమూర్తి భాగ్యమని అందరూ ఒప్పుకొని తీరాల్సిందే.

 దేవ దేవం భజే  దివ్య ప్రభావం 
రావణాసుర వైరి  రఘు పుంగవం రామం 
దేవ దేవం  భజే దివ్య ప్రభావం 
రాజవర శేఖరం  రవికుల సుధాకరం 
ఆజానుబాహుం  నీలాద్రికాయం 
రాజారి కోదండ  రాజ దీక్షా గురుం 
రాజీవలోచనం  రామచంద్రం  రామం 
దేవదేవం భజే దివ్య ప్రభావం ..... 


ఇక్కడ రావణాసుర వైరిని గురించి మాట్లాడతాను. అన్ని లోకాలనూ
లోక పాలకులనూ అష్టదిక్పాలకులనూ గడగడలాడించిన మహా పరాక్రమశాలి రావణాసురుడులాంటి వైరి లభించడం నిజంగా రాముని
భాగ్యమే.
           ఉపమా కాళిదాసస్య అని మహాకవి కాళిదాసుని అంటారు.
అలాంటి మహాకవి సాగరానికీ , ఆకాశానికీ , రామరావణ యుద్ధానికీ
ఉపమానాలు లేవన్నాడు. వాటికి అవే ఉపమానాలు అన్నాడాయన. అంతటి మహాసంగ్రామంలో గెలిచినందుకే శ్రీరాముడు ఆచంద్రార్కం కీర్తించబడుతూనే ఉంటాడు.

దీనిని మాయలు మంత్రాలు ఏమీ లేవనుకొని ఒక పెద్ద నవల అనుకొని చదవండి. దీనిలోని పాత్రలను పరిశీలిస్తే నాకు ఒక అద్భుతమైన విషయం
కనబడింది. ఇందులో ఏ పాత్రా కూడా ద్వంద్వ ప్రవృత్తిని కలిగి ఉండలేదు.
ఒకచోట ఒకలా మాట్లాడడం వేరే చోట వేరేలా మాట్లాడడంలాంటి సన్నివేశం ఎక్కడా కనబడదు. దుష్టులైతే దుష్టులుగానే కనబడతారు .సజ్జనులైతే సజ్జనులుగానే కనబడతారు. దుష్టులంటే ఇక్కడ ఒక విషయం ఉటంకించి తీరాలి .
హనుమంతుడు రావణుని అంతఃపురంలో  రావణుని చూసినప్పుడు దూరంగా ఉండే చూస్తాడు. దానికి ఒక కారణం ఉంది
నీతిశాస్త్ర పారంగతుడైన హనుమకి
శకటం పంచహస్తేషు దశహస్తేషు వాజినమ్
గజం సహస్ర హస్తేషు దుష్టం దూరేన వర్జయేత్ అని తెలుసు .
( శకటానికి ఐదు మూరలదూరంలోనూ , రథానికి పదిమూరల దూరంలోనూ
  ఏనుగుకి  వేయి మూరలదూరంలోనూ , దుష్టునికి వీలైనంత దూరంలోనూ ఉండాలన్నమాట)

        రామాయణ కావ్యాన్ని ఎవరు రాసినదేనా చదవండి. వాటిలోని కల్పనలను అన్నిటినీ చదవండి . కానీ వాల్మీకి మహర్షి రచించిన శ్లోకాలు
తాత్పర్యాలతో ఉన్న మూలం ఏదైతే ఉన్నదో దానిని చదివితేనే మీకు
మనం సీరియల్స్^లోనూ సినిమాలలోనూ చూస్తున్న గాథలు ఏవైతే ఉన్నాయో వాటిలో మూలంలో ఉన్నవి ఏవో , మూలంలో లేనివి ఏవో మీకు సులువుగా తెలిసిపోతుంది.  

      { మూలం ఏదైతే ఉన్నదో అవి తెలుగులో శ్లోకం అర్ధంతో గీతాప్రెస్ వారు మూడు భాగాలలో విడుదల చేసారు .
గీతాప్రెస్ గోరక్ పూర్ వాళ్ళ షాప్ ( no 41 , 4-4-1 , dilshada plaza )
సుల్తాన్ బజార్ , హైదరాబాద్ లోనూ
సికిందరాబాద్ రైల్వే స్టేషన్ ప్లాట్ ఫారం -1 లోనూ దొరుకుతాయి .
అన్ని వాల్యూమ్స్ కలిపి 500 నుంచి 600 రూపాయలలో దొరికేస్తాయి.
ఇద్దరు మల్టీప్లెక్స్^లో సినిమా చూసి పాప్కార్న్ తిన్నంత ఖర్చు అన్నమాట }

       యత్ర యత్ర రఘునాథ కీర్తనం, తత్ర తత్ర కృతమస్తకాంజలిం,
        బాష్పవారిపరిపూర్ణ లోచనం, మారుతిం నమతః రాక్షసాంతకం. _/\_ @శ్రీ 





                  






12/09/2016

|| సుఖము శాంతి - తెలుగుగజల్ ||



|| సుఖము శాంతి - తెలుగుగజల్ ||





|| సుఖము శాంతి - తెలుగుగజల్ ||

విశ్వశాంతి గీతాలను రచియించిన సుఖము శాంతి 
హింసలేని రాగాలను పలికించిన సుఖము శాంతి

కులమతాల జాడ్యంతో అజ్ఞానం పెరుగుతుంది 
విజ్ఞానపు వేదాలను వల్లించిన సుఖము శాంతి

దేవుళ్ళకు లంచమిచ్చి వరాలెన్నొ అడుగుతావు
జనులందరి మేలుకొరకు ప్రార్ధించిన సుఖము శాంతి

మనుస్మృతిని బోధించేవారిని వెలివేయాలీ 
వర్ణరహిత సమాజాన్ని నిర్మించిన సుఖము శాంతి

ఓట్లకి నోట్లను ఇస్తూ పిదప దోచుకుంటారు
సచ్చరిత్రగల నేతను గెలిపించిన సుఖము శాంతి

భార్యమాట మహారాజ్ఞి శాసనమని గ్రహించాలి 
ఇంటిమగడు మారాడక పాటించిన సుఖము శాంతి 

మూర్ఖులతో సావాసము ప్రమాదమే "నెలరాజా"
సద్గురువులతో పయనము సాగించిన సుఖము శాంతి

|| చెలి నీవే - తెలుగు గజల్ ||











|| చెలి నీవే - తెలుగు గజల్ || 

మనసువీణ  సరిగమలను వినిపించిన చెలి నీవే 
నా మదిలో  మధురగీతి పలికించిన  చెలి నీవే

రేకులలో సుకుమారము నీలో కనబడుతున్నది 
గులాబీల రాశిలోన జనియించిన  చెలి నీవే 

నీ కనులకు భయపడుతూ రాత్రిలోన దాగున్నవి 
చూపులతో చీకట్లను  బెదిరించిన చెలి నీవే 

హేమంతపు ఋతువు కూడ నులివెచ్చగ ఉంటుందీ 
శ్వాసలతో  శీతలాన్ని వణికించిన చెలి నీవే 

ఇలలోకలలో నన్నే వదలకుండ ఉంటావు 
విరహానికి వెనుదిరుగుట నేర్పించిన చెలి నీవే 

నీ వన్నెల కాంతి చూసి వెన్నెల అనుకుంటాయీ 
కొలనులోన కల్వపూలు పూయించిన చెలి నీవే 

నవ్వులతో మదిని కొల్లగొడుతూనే "నెలరాజా" 
గాలిలోన మల్లెపూలు పండించిన చెలి నీవే 






09/09/2016

|| ఉంటుంది - తెలుగు గజల్ ||









నింగిలో జాబిల్లి కదులుతూ ఉంటుంది 
కడలిలో నావలా సాగుతూ ఉంటుంది

ఆకుపచ్చని'కొమ్మ' నచ్చింది కాబోలు 
చినుకొకటి చిగురుపై వాలుతూ ఉంటుంది

కన్నయ్య పోలికలు మధుపానికున్నాయి 
పూవులన్నిటిపైన ఎగురుతూ ఉంటుంది

నా కనుల అద్దాలు చెలిని  చూపిస్తాయి
తనమీద దర్పణం అలుగుతూ ఉంటుంది

నదిలోని అందాన్ని కడలి చూస్తుంటుంది 
అలలతో వంపులను తడుపుతూ ఉంటుంది

'నెలరాజు'నడిగితే వెన్నెలను ఈయడు
మబ్బంటి చీకటే ముసురుతూ ఉంటుంది

ఏ గాలి వీచినా ప్రేమెపుడు ఆరదూ 
గుడిలోన దీపమై వెలుగుతూ ఉంటుంది 

08/09/2016

|| మెదులుతూ ఉంటుంది - తెలుగు గజల్ ||





|| మెదులుతూ ఉంటుంది - తెలుగు గజల్ || కలలోన నీరూపు మెదులుతూ ఉంటుంది కనులలో తిమిరమే తొలగుతూ ఉంటుంది యాచనలు చేయడం నా మదికి తెలియదూ నీమనసునిమ్మంటు అడుగుతూ ఉంటుంది నీమేని వన్నెలను చోరీలు చేస్తుంది హరివిల్లు కొత్తగా విరుగుతూ ఉంటుంది నిను తలుచుకుంటూనె రాస్తాను ప్రతిషేరు గతిలోన నా గజలు ఒదుగుతూ ఉంటుంది శుక్లపక్షములోని జాబిల్లియే సాక్షి నీమీద నా వలపు పెరుగుతూ ఉంటుంది హేమంత ధూమాలు వణికిస్తు ఉన్నాయి నా తనువు నీదరికి జరుగుతూ ఉంటుంది ఇద్దరం ఒక్కటై కనబడితె "నెలరాజ" రాత్రిలో తన్హాయి మరుగుతూ ఉంటుంది #శ్రీ